A wannan Larabar ce a ke saran shugaba Volodymyr Zelensky na Ukraine zai kai ziyara a birnin Washington, ziyarar da za ta kasance irinta ta farko a ketare tun bayan da Rasha ta kai mamaya kasarsa, a cewar kafafen yada labaran Amurkan, ba tare da ayyana majiyarsu ba.

Rahotanni na nuni da cewar shugaban na Ukraine zai gana da Shugaba Joe Biden a fadar gwamnati ta White House, kana daga bisani yayi jawabi a gaban 'yan majalisar Amurkan.

A yayin ziyarar ta Zelensky kazalika, ana saran Amurkan ta sanar da bai wa Ukraine tallafin nau'rorin kare hare-hare ta sararin samaniya, wadda Kiev za ta yi amfani da su wajen kare kanta daga harin jiragen yaki da makamai masu linzami ko da kuwa daga nesa aka harba.