Ministar harkokin wajen Jamus, Annalena Baerbock za ta kai ziyara ranar Lahadi mai zuwa Isra'ila inda wannan zai zama ziyarar ministar na hudu tun lokacin da yaki ya barke a Zirin Gaza tsakanin Isra'ila da 'yan ta'adda na kungiyar Hamas na Falasdinu.

Karin Bayani: Jamus ta damu da rikicin Isra'ila

Ma'aikatar harkokin wajen Jamus ta ce ministar za ta gana da manyan jami'an gwamnatin Isra'ila lokacin ziyarar sannan Baerbock za kuma ta kai ziyara kasar Masar gami da Lebanon. Haka na zuwa lokacin da ake nuna tsoron yuwuwar rikicin tsakanin Isra'ila da Hamas zai fantsama zuwa wasu wurare a yankin Gabas ta Tsakiya.