Во кинеските големи градови секојдневно милиони возачи се заглавени во сообраќајни турканици. За Волво се тоа идеални услови за тестирање на самоуправувачки возила.

Хакан Самуелсон, раководител во Волво, вели:

„Кина е земја во која навистина има потреба од самоуправувачки автомобили. Овде стотици илјади луѓе секојдневно минуваат многу долго време зад управувачот и така губат време. Токму тие се нашите потенцијални муштерии.“

Овде може да го погледнете видеото:

Волво е дел од кинескиот автоконцерн Џили. И тоа сигурно е една од причините зошто 100 самоуправувачки возила на Волво ќе бидат тестирани во секојдневието токму во Кина. Кинеските власти се многу отворени за новата технологија. За нив самоуправувачките возила се можност за подобро канализирање на сообраќајните бранови во преполнетите градови. Но, иако кинеските муштерии генерално важат за наклонети кон техниката, ќе треба да се поработи уште на нивно убедување.

„Потрошувачите отсекогаш биле скептични кон нова техника. Затоа мора да излеземе на улиците и да покажеме како функционираат нашите автомобили. Се разбира, важно е и тоа што луѓето веруваат во нашата безбедност“, вели Самуелсон.

Волво има намера да гарантира во случај на несреќа. Сѐ уште не јасно каде и кога ќе почне тестот во Кина. Меѓутоа, автопроизводителот најави дека првите самоуправувачки возила би требало да им бидат продадени на кинеските купувачи во 2020 година.