Автоиндустријата стравува од катастрофа поради Брегзит
БГ
23 септември 2019
Европското здружение на авто-производители и неколку национални здруженија на автоиндустријата предупредуваат од „катастрофални последици“ доколку се случи Брегзит без договор.
Фотографија: Getty Images/D. Hecker
Реклама
На околу еден месец пред излегувањето на Велика Британија од ЕУ, Европските здруженија на авто-производители како и 21 национално здружение во заедничка изјава предупредија на последиците за нив доколку се реализира Брегзит без договор.
Шефовите на автоиндустријата предупредуваат дека последиците во „виталните сектори“ ќе бидат тешки.
„Заминувањето на Обединетото Кралство од ЕУ без договор ќе отвори сеизмички промени во условите за трговија, а милијардите евра кои ќе бидат наметнати како царини ќе имаат големо влијание врз изборот на потрошувачите и врз цените од двете страни на Каналот“, велат тие во заедничка изјава.
„Крајот на безцаринската трговија ќе предизвика штетни последици врз оперативниот модел на индустријата, затоа што цената на запирањето на производството на само една минута во Велика Британија изнесува 54,700 евра“.
Првите луѓе на автоиндустријата проценуваат дека трговијата меѓу ЕУ и Британија ќе се соочи со дополнителни давачки од 5,7 милијарди евра, што пак ќе влијае на пораст на цената за крајните потрошувачи.
Затоа тие предупредуваат дека мора да се изнајде начин за Брегзит да се изведе по редовен пат и со меѓусебен договор.
Првиот човек на германската автоиндустрија, Бернхард Матес вели дека неговата бранша поседува повеќе од 100 производствени капацитети и центри за истражување и развој во Велика Британија.
„Од гледна точка на германската автоиндустрија, мора да се стори се за да се обезбеди слободно движење на стоки, услуги, слобода на капиталот и слободно движење на работници меѓу Обединетото Кралство и ЕУ“.
Збогум Британија, ние си заминуваме...
Британските компании многу пати предупредуваа за потенцијалните негативни последици по економијата од Брегзит. По референдумот за напуштање на ЕУ, некои компании размислуваат да ги релоцираат компаниските седишта.
Фотографија: picture-alliance/dpa/W. Kumm
Водафон
Втората по големина компанија за мобилна телефонија во светот ја разгледува опцијата да го премести своето седиште надвор од Британија по Брегзит. Диселдорф би можел да биде една од опциите за новото седиште на компанијата. Водафон веќе е присутна во германскиот град каде вработува околу 5.000 луѓе, исто така, Германија е најголемиот пазар на компанијата.
Фотографија: Getty Images/AFP/M. Hayhow
Рајанер
Најголемата авиокомпанија за ефтини летови во Европа официјално е регистрирана во Ирска, но голем дел од нејзината флота е лоцирана во Британија. Но, тоа може наскоро да се смени – од Рајанер најавуваат дека своите летала повеќе нема да ги стационираат таму.
Фотографија: picture-alliance/dpa/M. Scholz
Изиџет
Втората по големина авиокомпанија за ефтини летови во Европа е базирана во Лондон, но, до кога? „За тоа ќе видиме“, изјави извршната директорка на компнанијата Керолин Мек Кол во телевизиско интервју. Изиџет е една од најпрофитабилните компании во Европа.
Фотографија: Getty Images/AFP/F. Guillot
Вирџин
Ричард Бренсон е еден од најпознатите бизнис личности во Британија. За Брегзит тој изјави: „Британија е насочена кон економска катастрофа“. Неговиот конгломерат изгуби една третина од вредноста по референдумот во земјата. Бренсон ја повика владата да организира втор референдум.
Фотографија: Getty Images/AFP/D. Leal-Olivas
ЏејПиМорган Чејс
Најголемата банка во САД вработува околу 16.000 луѓе во Лондон. Но, менаџментот сега разгледува повеќе можности да премести дел од операциите надвор од Британија. Извршниот директор на банката, Џејми Димон, пред референдумот изјави дека помеѓу 1.000 и 4.000 работни места може да бидат преместени надвор од Лондон доколку се случи Брегзит.
Фотографија: Getty Images/C.Gillon
Виза
Оваа компанија ќе нема голем избор освен да го намали бројот и обемот на активностите во Британија, што ќе доведе до кратење на стотици работни места. Според регулативата на ЕУ, компанијата мора да одржува центар за податоци во земја на ЕУ. Што практично ќе значи крај за податочниот центар на компанијата во Лондон.
Фотографија: Imago
Форд
Од Форд неколку пати изјавија дека Британија е „клучен пазар“ за компанијата во Европа. Фабриката на Форд во Дагенхам произведува делови и мотори за филијалите на компанијата во Германија. По одлуката за напуштање на ЕУ, од Форд изјавија дека компанијата ќе ги преземе сите потребни мерки да остане конкурентна на пазарот.
Фотографија: picture-alliance/dpa
Јагуар Ленд Ровер
Сепак, сите компании не се песимисти. „Ние сме Британци и стоиме зад Британија“, изјави Едријан Халмарк, одговорен за стратегии во Јагуар Ленд Ровер. Нема промени во нашите бизнис планови, уверува Халмарк за периодот од следните две години во кои Британија со сигурност ќе остане дел од ЕУ.
