При полетувањето на американски воен авион во Кабул пред два дена луѓе се држеа за леталото, повеќемина најверојатно загинаа. Во подвозјето на авионот е пронајдено тело на починат. За индицентите е отворена истрага.
Фотографија: ASSOCIATED PRESS/picture alliance
Реклама
Американското воено воздухопловство отвори истрага во врска со хаосот околу полетувањето на еден воен авион на аеродромот во Кабул. Авион на американското воено воздухопловство во понеделникот (16.08) полетуваше од аеродромот во Кабул опкружен од стотици цивили на пистата. Драматичните сцени го обиколија светот. На едно видео можеше да се види како голем број луѓе трчаат покрај американскиот авион во движење. Дел од нив се имаа качено на долниот дел од авионот и се држеа цврсто за него.
Сега воената авијација соопшти дека по слетувањето на тој авион во Катар, во подвозјето на леталото е пронајдено тело на починат. Авионот е приземјен за да биде извршена истрага. Во истрагата се вклучени и видеа и други содржини од социјалните мрежи.
Особена запрепастеност предизвикаа снимките на кои наводно се гледа како луѓе паѓаат од авионот од голема височина. Се претпоставува дека биле скриени во подвозјето или дека се држеле цврсто. Американското воено воздухопловство во своите соопштенија не наведува дали навистина од голема височина паѓале луѓе од авионот. Портпаролката Ен Стефанек, меѓутоа, изјави дека иследниците сега ги вештачат видео-снимките на кои, според претпоставките, се гледа како најмалку двајца Авганистанци паѓаат од американски воен транспортен авион. Се проверуваат сите информации со коишто се располага.
Фотографија: AP Photo/picture alliance
Американското воено воздухопловство соопшти дека авионот од типот C-17 во понеделникот слетал во главниот град на Авганистан со цел да достави опрема за акциите за евакуација. Меѓутоа, пред екипажот да може да го истовари она што било во авионот, леталото било опколено од стотици Авганистанци кои се пробиле низ безбедносните блокади. Со оглед на рапидно влошената безбедносна состојба, екипажот одлучил да ја напушти пистата најбрзо што е можно. Подоцна пистата беше расчистена од страна на американски војници, за авионите, меѓу нив и од Германија, да можат да полетуваат и слетуваат.
„Војната во Авганистан заврши'“
Претседателот на државата избега, радикално исламистичките талибанци ја зазедоа претседателската палата во Кабул. Населението во Авганистан е во неизвесност и страв. Странците се евакуираат.
Фотографија: Zabi Karim/AP/picture alliance
Талибанците во центарот на моќта
По изненадувачки брзата офанзива во Авганистан, радикално исламистичките талибанци прогласија победа. Само по околу три месеци од почетокот на повлекувањето на меѓународните трупи од земјата, талибанците ја зазедоа палатата на претседателот Ашраф Гани.
Фотографија: Zabi Karim/AP/picture alliance
Исламистите сакаат „да ги решат проблемите“
„Војната во Авганистан е завршена“, изјави Мохамад Наим, портпарол на талибанците. „Ги молиме сите земји и организации заедно да работиме на решавање на сите проблеми“, додаде тој. Формата на идната влада ќе биде набрзо објавена.
Фотографија: Sefa Karacan/AA/picture alliance
Симбол на новите владетели
На многу места во Авганистан талибанците го имаат закачено своето знаме. Така е и на централниот плоштад во Кундус (на фотографијата). Освојувањето на провинцискиот главен град во североистгочен Авганистан пред неколку дена беше шок за Западот. Во Кундус десет години беа стационирани германски војници.
Фотографија: Abdullah Sahil/AP Photo/picture alliance
Полициско возило во рацете на талибанците
САД потрошија милијарди долари за обука и опремување на авганистанската војска и полиција. Со капитулацијата на овие сили речиси без отпор, оружјето и опремата сега е во рацете на исламистите. На фотографијата талибански борци во полициско возило патролираат пред аеродромот во Кабул.
Фотографија: REUTERS
Гани е веќе во странство
Авганистанскиот претседател (на фотографијата - во текот на телевизиски говор непосредно пред бегството) наводно избегал во Узбекистан. Ашраф Гани е заедно со шефот на својот штаб во Ташкент, јави Ал Џазира повикувајќи се на информации на телохранител на Гани.
Колони на улиците на Кабул на 15.08.2021 - многумина сакаат да ја напуштат земјата што побрзо. Според медиумски извештаи, талибанците наредиле никој да не биде спречуван при заминувањето од земјата. Многу луѓе се обидуваат да стигнат до аеродромот во Кабул пеш.
Фотографија: Khodaiberdi Sadat/AA/Getty Images
Гужви на аеродромот
Голем број држави ги повикаа своите граѓани веднаш да го напуштат Авганистан. Пред шалтерите на аеродромот во Кабул има долги редици веќе неколку дена. Во тек е и акцијата на враќање на германските државјани во татковината.
„Правиме сѐ за да им овозможиме на нашите државјани и нашите поранешни локални соработници да заминат во наредните денови“, изјави германскиот министер за надворешни работи Хајко Мас. Авиони на германскиот Бундесвер заминаа во Авганистан како поддршка на евакуацијата.
Фотографија: Moritz Frankenberg/dpa/picture alliance
