Најмалку 16 луѓе загинаа во катастрофалниот земјотрес кој утринава погоди градови во околината на Тирана. Преживеаните раскажуваат за хоророт кој се случувал. Спасувачките екипи се уште трагаат по преживеани.
Фотографија: Reuters/F. Goga
Реклама
Земјотресот со јачина од 6,4 степени кој рано утрово ја зафати Албанија се почуствува и во Македонија и во другите балкански држави. По големиот земјотрес следувале уште најмалку 100 афтершокови, од кои два биле со магнитуда од 5 степени, што дополнително ги надразни нервите на преплашените граѓани.
Голем број куќи и згради во погодениот регион се уништени. Сведоштвата на преживеаните се потресни.
„Се беше во пепел и магла и мирисаше на прашина“, вели Розина Мирта чија куќа не настрадала, но зградата до неа се претворила во купишта урнатини.
„Луѓето врискаа и плачеа, а потоа следуваа уште земјотреси“, вели таа.
Фотографија: DW/A. Ruci
Иракли Симони дошол да помогне во градот Туман каде многу луѓе се уште се под урнатините. На неговите раце беа видливи траги од крв.
„Крвта е од човекот заробен под урнатините кому се обидуваме да му помогнеме. Врз него лежи тело на друг мртов човек. Разговарам со него, се обидувам да го одржам во живот. Неговиот стан бил на четвртиот кат“, вели Симони.
Марјана Ѓока, 48, спиела во својот стан на четвртиот кат на петкатна зграда во Туман кога земјотресот ги урнал горните катови.
„Кровот падна на нашите глави и не знам како избегавме. Господ ни помогна“, вели Ѓока.
Епицентарот на земјотрост бил на 30 километри западно од Тирана, но неговата разорна сила беше почуствувана насекаде низ Балканот, како и во јужна Италија.
Неколку часа подоцна земјотрес со јачина од 5,4 степени ја погоди и Босна и Херцеговина, но нема податоци за повредени.
По земјотресот во Албанија: Акција за спасување во Туман
01:55
This browser does not support the video element.
Најголем дел жртви- 10, беа пронајдени во урнати згради во Драч, додека 42 лица биле извлечени живи од урнатините. Во Туман загинале пет луѓе, а еден во градот Курбин. Меѓу загинатите е и една постара жена која сепак успеала да го спаси својот внук заштитувајќи го со своето тело.
Во спасувачките операции вклучени армијата, полицијата и пожарникарите, а помош испраќаат сите соседни земји и членките на НАТО.
Според албанските органи, ова бил најсилниот земјотрес забележан во земјата во последните 30 години.
Земјотреси кои го потресоа светот
Од големите земјотреси во Антиохија во 342 и 526 година, до денес, историјата памети огромни потреси кои неретко биле проследени и со гигантски цунами бранови во некои делови од светот.
Фотографија: picture-alliance/D. Nucci/NurPhoto
Централна Италија во рушевини
Последниот голем земјотрес во Европа се случи во централна Италија. Земјотресот кој удри на 24 август годинава однесе 256 животи, и остави повеќе од 40 илјади луѓе без покрив над главата.
Фотографија: picture-alliance/dpa/M. Gambarini
Лабрадорот Лео
Лабрадорот Лео беше поздравен од папата Франциско на 3 септември годинава за време на беатификацијата на Мајка Тереза. Лабрадорот стана инстант-херој откако во урнатините од земјотресот пронајде четиригодишно дете.
Фотографија: picture alliance/AP Images/L'Osservatore Romano
Танзанија
Земјотрес со јачина од 5,7 степени го погоди северозападниот регион на Танзанија на 10 септември годинава. Во катастрофата загинаа најмалку 16 луѓе, а 250 беа повредени.
Фотографија: Imago/Xinhua
Вежби за децата во Јапонија
Јапонија е екстремно трустно подрачје, и во минатото честопати беше погодувана од силни земјотреси. На 1 септември секоја година, кога се одбележува годишнината од големиот земјотрес од 1923 година, децата во основните училишта учествуваат во специјални вежби за заштита при земјотрес.
Фотографија: picture-alliance/dpa/M. Taga
Потрага по најблиските (Беичуан, Кина)
Мајка го оплакува својот син кој загина во катастрофалниот земјотрес кој ја погоди провинцијата Сичуан во Кина на 19 август 2008 година. Повеќе од 1,500 ученици и учители загинаа во земјотресот, кој севкупно однесе 69 илјади човечки животи.
Фотографија: Getty Images/China Photos
Катастрофата во Хаити
На 12 јануари 2010 година, Хаити беше погоден од катастрофален земјотрес со магнитуда од 7 степени. Над 200 илјади луѓе загинаа во природната катастрофа, а речиси три милиони луѓе беа погодени. Главниот град Порт-о- Принс беше срамнет со земја.
Фотографија: picture alliance/dpa
Земјотресот во Суматра
На 26 декември 2004 година разурнувачки земјотрес со јачина од 9,2 степени го погоди западниот брег на Суматра, во Индискиот Океан. Земјотресот и бројните цунами бранови кои се подигнаа како последица од него однесоа 230 илјади животи во 14 земји. Тоа е третиот најсилен земјотрес забележан во историјата и истовремено, удар со најдолго траење- меѓу 8 и 10 минути.
Фотографија: Getty Images/S. Platt
Музафарабад, Кашмир
Потресот чиј епицентар беше кај градот Музафарабад во Пакистан во октомври 2005 година опфати регион од 30 илјади квадратни километри. Во непосредната околина загинаа 84 илјади луѓе. Земјотресот беше со јачина од 7,6 степени.
Фотографија: AFP/Getty Images/F. J. Brown
Л' Аквила- земјотрес и одговорност
Земјотресот во Л'Аквила, во централна Италија од 6 април 2009 година, однесе 308 човечки животи. Бројни контроверзи следеа по катастрофата, откако 6 научници и еден државен службеник беа осудени на затворски казни поради тоа што не предупредиле на опасноста од земјотресот. Во 2014 година, пресудите на научниците им беа укинати.
