Меркел: Претстои најтешката фаза на Ковид - пандемијата
ЖА / агенции
9 јануари 2021
Наредните недели ќе бидат најтешки во корона-кризата, смета канцеларката, а излез гледа во вакцинирањето. Според Меркел, заедничката набавка на вакцина во ЕУ е правилна: „Ниедна земја сама не може да го победи вирусот“
Фотографија: John MacDougall/AP Photo/picture alliance
Реклама
Во својот прв подкаст во оваа година, германската канцеларка Ангела Меркел инсистира на запазување на донесените најнови мерки во земјата за сузбивање на коронавирусот. „Колку сме поконсеквентни денес, толку побрзо ќе можеме да ја повратиме контролата и ќе го скратиме времето во кое мораме да живееме со вакви рестрикции. Присебноста во овие тешки јануарски недели и имањето обѕири кон другите ќе се исплатат“, вели Меркел.
Надеж за подобрување на ситуацијата канцеларката гледа во почетокот на вакцинирањето. „Од месец во месец ќе има вакцина за сѐ повеќе луѓе, а на крајот ќе можеме да му понудиме вакцина на секој кој сака да ја прими, а јас се надевам дека понудата ќе биде што пошироко прифатена".
Канцеларката е убедена во правилноста на одлуката вакцината да се набавува на ниво на ЕУ. „Мое цврсто уверување е дека е добро што се решивме за европски пат. Ниедна земја, па ни Германија, не би била сигурна од вирусот ако не се сигурни пријателите и соседите.“
Меркел е загрижена од актуелниот развој на пандемијата: „Лекарите и болничкиот персонал во многу болници работат на границите на своите можности. И она што го слушаме за мутирањето на вирусот не ја намалува нашата загриженост, напротив“ вели Меркел и од таа причина инстистира на целта – значително намалување на бројот на нови инфекции до ниво на кое здравствените заводи ќе бидат во можност да ги следат синџирите на зараза.
Институтот Роберт Кох денеска го објави дневниот биланс – во последните 24 часа се регистрирани 24.700 новоинфицирани и 1083 смртни случаи поврзани со коронавирус. Вкупниот број на починати од Ковид-19 во Германија со тоа се искачи на 39.878.
Како коронавирусот го промени животот
Пандемијата на коронавирусот го промени од корен начинот на живот на каков што луѓето беа навикнати.
Фотографија: Aleksandra Najdovska/DW
Ставете маска
И покрај тоа што македонските здравствени власти постојано предупредуваат дека носењето маска е важно за превенција од пандемијата на коронавирус, дел од луѓето сѐ уште се противат на носење маски. За неносење маски казната за граѓаните е 20 евра, за правните лица – 2000 евра. Затоа влезовите на продавниците од почетокот на пандемијата се „украсени“ и со вакви предупредувања.
Фотографија: Aleksandra Najdovska/DW
Рестрикции и на отворено
Во С. Македонија маски мора да се носат и на отворено, а забрането е и групирање на јавен простор на повеќе од 4 лица по 21 часот. Не се групирајте, е апел кој постојано се повторува од страна на надлежните. Резултатите се половични – покрај дисцплинираните, сѐ уште има луѓе кои се групираат и не преземаат превентивни мерки. Оваа празна клупа трпеливо чека на крај на пандемијата и рестрикциите.
Фотографија: Aleksandra Najdovska/DW
Здравствена криза, економска криза
Угостителските објекти работат со ограничено работно време – само до 21 часот. Исклучок се оние со сервис за испорака. Празните ресторани и кафулиња ја отсликуваат новата реалност што ја создаде пандемијата на Ковид-19. Многу фирми, посебно малите, се плашат од пропаѓање. Ќе им бидат ли доволни средствата за помош од државата?
Фотографија: Aleksandra Najdovska/DW
Каде се другарите?
Околу 90% од учениците следат онлајн-настава, а без проблеми се одвива и наставата со физичко присуство, тврди министерката за образование Мила Царовска. Пандемијата ја забрза дигитализацијата на образованието. Но, привремено го запре нормалниот детски живот. Како актуелното намалување на социјалните контакти влијае врз детскиот развој ќе биде веројатно предмет на многу истражувања во иднина.
Фотографија: Aleksandra Najdovska/DW
Помала осаменост со домашно милениче
Домашните миленици, во време на затворање дома, можат да бидат добар чувар од психолошкиот стрес што со себе го носи пандемијата. Според студија на универзитетите Јорк и Линколн, 90% од испитаниците сметаат дека домашното милениче им помогнало во емоционалното справување со „локдаунот“, а дури 96% се уверени дека со помош на домашното милениче останале во добра физичка кондиција.
Фотографија: Aleksandra Najdovska/DW
Сѐ за здравје
Од почетокот на пандемијата на Ковид-19, во пораст е побарувачката по витамини и сѐ што може да придонесе за зајакнување на имунитетот. Конзумирањето суплементи стана секојдневна рутина на многумина. Притоа, голем дел од она што го препорачуваат лекарите, не го покрива Здравствениот фонд, туку е приватен трошок. Лекувањето чини пари, превенцијата исто така. Но, сѐ за здравје!
