Големите маси мраз на Антарктикот од 2012 година се топат трипати побргу и со тоа нивото на морињата расте многу побрзо. Научниците предупредуваат да се дејствува за да се ограничат катастрофалните последици за светот.
Фотографија: Reuters/A. Meneghini
Реклама
Топењето на мразот на Антарктикот алармантно се забрза, предупредија денеска научниците, додавајќи дека на Антарктикот од 1992 година исчезнаа 3.000 милијарди тони мраз.
Количеството на вода ослободена со топење на мразот на Антартикот е клучен показател за климатските промени во последната четвртина од векот, таа е доволна да го потопи Тексас со бран висок 4 метри, пресметаа научниците.
Како што се наведува, оваа вода предизвикала глобално зголемување на нивото на океаните за 7,6 милиметри.
Истражувањето објавено во весникот „Натура“ покажува дека Антарктикот во периодот меѓу 1992 и 2011 година годишно губел речиси 84 милијарди тони мраз, а во последните 5 години овој број е зголемен на над 241 милијарди тони.
„Мислам дека треба да се загрижиме, но тоа не значи оти треба да очајуваме“, вели Изабела Великогна од Универзитетот во Калифорнија, една од 88-те автори на истражувањето. Како што наведе, промените се случуваат побрзо од очекуваното.
Делови од западниот Антарктик, каде што топењето е најбрзо, се во фаза на распаѓање, наведе коавторот Ијан Џонхин од Универзитетот во Вашингтон.
Научниците од Американската вселенска агенција (НАСА) и Европската вселенска агенција спроведуваат истражувања на секои неколку години за да имаат сеопфатна слика за тоа што се случува на Антарктикот и на Гренланд.
Стручњаците наведуваат дека само топењето на мразот на Антарктикот до крајот на векот би можело да го подигне нивото на морето за 16 сантиметри. Студијата е спроведена на 24 различни локации, со 15 сателити, истражувања на теренот и со компјутерски симулации.
Промена на климата: Екстремно време, екстремни последици
Бранови на горештини, недостиг на вода, топење на глечерите, уште сега се забележува промената на климата, а времето нешто да се преземе против последиците, истекува.
Фотографија: AP
По жештината и поплавите следува глад
Крајно време е да се преземат мерки против екстремните временски услови, посебно во најсиромашните земји, како во Африка. Веќе по 20 или 30 години, вели извештајот на Светската банка, промената на климата ќе има речиси незамисливи последици. Сушите и поплавите ќе доведат до недостиг од храна.
Фотографија: AP
Светското население и натаму се множи
Светското население до 2050 година ќе достигне до околу девет милијарди луѓе, гласат прогнозите. Тоа значи - потребно е двојно повеќе ориз, пченка и пченица отколку денес. Американските научници предупредуваат - производството животни продукти уште сега расте пребавно за да го задоволи гладот во светот.
Фотографија: dapd
Премногу вода
Додека поплавите ги загрозуваат жетвите, друга опасност произлегува од растењето на морското ниво. Научниците предупредуваат дека нивото во моментов расте 60 проценти побрзо од очекуваното. Последица: се заканува потонување на помалите острови.
Фотографија: Grit Hofmann & Carmen Meyer
Морска наместо несолена вода
Со покачувањето на нивото на морињата во почвата продира солена вода. На неа е изложена и вегетацијата, како на овој остров во Микронезија. Тоа е штетно за растенијата и истовремено носи големи проблеми за земјоделството и крајбрежните региони.
Фотографија: Grit Hofmann & Carmen Meyer
Во опасност се белите дробови на планетата
Амазонските прашуми, како овде во Бразил, ја штитат климата со тоа што користат ЦО2. Но, бидејќи во регионот станува пожешко и посуво, тој е загрозен од затоплувањето на Земјата. Во најлош случај прашумата од корисник, може да стане извор на ЦО2.
Фотографија: picture-alliance/dpa
Се топи мразот на Гренланд
Гренланд е до 85 проценти покриен со мраз. Со глобалното затоплување, меѓутоа, тој брзо се топи, со што се покачува нивото на морињата. Кога се топи белиот мраз од Арктикот, водата која потемнува од топењето прима повеќе топлина, која инаку мразот ја рефлектира во вселената.
Фотографија: Ian Joughin/University of Washington
Се топи и Антарктикот
Мразот на Антакрктикот се смета за постабилен отколку оној на Гренланд. Но, најновите мерења покажуваат дека мразот се топи и на Арктикот во последните 20 години, откако се вршат мерења во овој регион.
Фотографија: Alfred-Wegener-Institut/Simon/Simon
Трајниот мраз - темпирана бомба
На Арктикот засилено се топи трајниот мраз. Тоа предизвикува ослободување на штетни гасови, како ЦО2 и метан. Научниците стравуваат дека долгорочно тоа ќе води кон повратна реакција. Топењето ќе предизвика натамошно затоплување. Научниците ги контролираат емисиите на гасови, како овде на Гренланд.
Фотографија: DW/Irene Quaile
Лоши вести за школките и морските полжави
Океанот прима се‘ повеќе ЦО2. Тоа води кон се‘ поголема киселост на морињата, со што се намалува ПХ-вредноста. Ова влијае врз морските организми како школките и морските полжави: нивните черупки стануваат полесни и потенки. Научниците ги истражуваат последиците врз животот во морето.
Фотографија: DW/Irene Quaile
Изумираат коралите
Од зголемената киселост на морињата се погодени и коралите, како Грит Бариер Риф во Австралија. Тие изумираат поради зголемената киселост на водата. За многу луѓе овие области со коралски колонии богати со риби се важни поради исхраната, а освен тоа коралскиот туризам за помалите земји е важен извор на приходи.
