Врнежи од снег проследени со поларни температури зафатија делови од Европа за време на викендот, а продолжија и денеска. Римскиот Колосеум по подолго време осамна со снежна обвивка. На Балканот завеани патишта.
Реклама
Арктичката бура која ја погоди Европа, доведе до затворање на училишта во Бугарија и Романија, и проблеми во сообраќајот. Мобилизирани се илјадници дополнителни работници за надминување на состојбата.
Во Германија, на алпскиот врв Цугшпице беше забележана рекордно ниска темперура од -27 степени целзиусови за оваа зима. Во северните покраини откажани се десетици летови поради снегот и ниските температури.
Во Италија, агенцијата за цивилна заштита ја испрати армијата да ги расчистува улиците затрупани од снег во главниот град Рим, кој утрово беше речиси парализиран. Јавниот транспорт речиси е целосно запрен, иако во градот паднаа само неколку сантиметри снег.
На Балканот, во Хрватска и БиХ, снежното невреме завеа цели региони и ги затвори патиштата. Хрватската влада ангажираше околу 1.000 војници да ги расчистуваат најтешко погодените региони.
Градовите на хрватското крајбрежје се погодени од силни ветрови кои го оневозможуваат сообраќајот кон островите. Погледнете повеќе во видеото:
Балканот завеан во снег
01:18
Во следнава галерија потсетуваме и на тоа како во минатата година зимата го држеше во костец Балканот:
Југоисточна Европа во канџите на зимата
Спортистите се радуваат, но луѓето без покрив над главата и греење се загрозени од снегот и мразот. Повеќе од 70 луѓе веќе починаа поради студ. Прогнозите велат - мало зголемување на температурите, а потоа повторно студ.
Фотографија: Reuters/B. Szabo
Ослободена од мразот
Студот ги погаѓа и луѓето и животните. Оваа птица беше замрзната во Дојранско Езеро. Без помошта на рибарите беше соочена со смрт.
Фотографија: Reuters/O. Teofilovski
Ни трага од променадата
Променадата во Солун: некаде зад уличните фенери би требало да биде и морето. Додека снегот на југот на Грција веќе е истопен, на северот е студено како што не било со децении.
Фотографија: Reuters/A. Avramidis
Во ред за топол оброк
На Балканот без доволна заштита од студот се и многу бегалци. Според хуманитарните организации, во Белград под отворено небо на температури под нулата спијат повеќе од 1200 бегалци.
Фотографија: Reuters/M. Djurica
Студот убива
Поради студот од почетокот на годинава само во Полска починаа најмалку 27 луѓе. Тие или замрзнале поради екстремно ниските температури, или починале од труење со јаглерод моноксид, поради тоа што за греење се пали сѐ и сешто.
Фотографија: picture-alliance/NurPhoto/J. Arriens
Санти мраз меѓу Будим и Пешта
Убавата страна на студот - унгарскиот парламент во вечерно светло, додека замрзнатиот Дунав тече меѓу Будим и Пешта. Она што ги восхитува туристите, им е кошмар на сиромашните. Министерството за внатрешни работи соопшти дека со дрва за греење снабдило 185.000 унгарски семејства во нужда.
Фотографија: Getty Images/AFP/A. Kisbenedek
Пауза за топовите за снег
Речиси невообичаена слика: нов снег кој не доаѓа од топови за снег. Во скијачкиот регион Цаухензе кај Салцбург луѓето се радуваат на зимата и снегот. Во Австрија и јужно од нејзе и наредната недела треба да биде ужасно студено.