Германската партија Алтернатива за Германија засега не смее да биде класификувана и третирана како „сомнителен случај“ од страна на Службата за заштита на уставниот поредок. Ваквата пресуда доаѓа по претставка на АфД.
Реклама
Германската служба за заштита на уставниот поредок засега не смее да презема мерки на надзор против партијата Алтернатива за Германија (АфД), која е под сомнение за екстремизам. Ваква одлука донесе денеска Управниот суд во Келн, со што ја одобри претставката на АфД. Во исто време, судот ја обвини германската контраразузнувачка служба за прекршување на доверливоста на случајот договорена со судот.
Портпаролот на судот Мајкл От изјави дека Управниот суд со таканаречена привремена одлука ги забранил активностите на Службата за заштита на уставниот поредок се' додека не биде донесена судска одлука за итната претставка на АфД против нејзин надзор и класификација како сомнителен случај. Проценка на содржината на класификацијата како можна опасност за уставниот поредок не е поврзана со суспендирање на надзорот што сега е наредено. Кога ќе биде донесена одлуката за итната претставка на АфД, засега останува отворено.
Управниот суд ја образложи својата одлука со тоа дека класифицирањето на АфД како сомнителен случај било објавено од страна на медиумите и со тоа на „неоправдан начин бил извршен упад во уставно загарантираните еднакви шанси на политичките партии“. Судот ја прекори Службата за заштита на уставниот поредок истакнувајќи дека сето говори за тоа оти тајната служба не ги исполнила своите ветувања за мирување, односно не се погрижила за тоа информациите релевантни за постапката да не протечат во јавноста.
Заднината на ова е претходна претставка од АфД, во која десничарско-популистичката партија на крајот на јануари веќе побара привремена судска наредба со која на Службата за заштита на уставниот поредок ѝ се забранува класифицирање на партијата како „екстремистички потфат“ и нејзино ставање под надзор. Покрај тоа, АфД сакаше со апликацијата да постигне контраразузнувачката служба да не смее да ја објави својата проценка.
Илјадници луѓе на протести против АФД
00:58
This browser does not support the video element.
Судиите тогаш го отфрлија барањето на АфД веднаш да ѝ се забрани на Службата за заштитата на уставниот поредок да ја прогласи партијата за сомнителен случај и да врши нејзин надзор. Тие тогаш го поврзаа тоа со „ветувањето за молчење“ од страна на контраразузнувачката служба. Тоа значи, дека надзорот на партијата не треба да биде јавно објавен. За судиите, меѓутоа, по медиумските извештаи во последниве денови, е јасно дека тајната служба е одговорна за фактот дека класификацијата на АфД како сомнителен случај за екстремизам протекла во јавноста.
Во средата, имено, стана познато дека Службата за заштита на уставниот поредок ја прогласила АфД за сомнителен случај на десничарски екстремизам и со тоа овозможува надзор на партијата со разузнавачки средства. Раководството на партијата беше огорчено и обвини дека зад одлуката на Службата стојат политички мотиви.
Колку е радикална европската десница?
Бавен економски раст, незадоволство поради политиките на Европската унија и мигрантската криза доведоа до изборен успех на десничарските партии низ цела Европа.
Фотографија: picture-alliance/dpa
Фрауке Петри, Алтернатива за Германија (АФД)
Лидерот на Алтернатива за Германија, Фрауке Петри изјави дека полицијата може да користи оружје како крајна мерка при спречување на илегално преминување на границата, потенцирајќи дека „таков е законот“. Она што започна како евроскептична партија се претвори во антиестаблишмент и анти-ЕУ политичка сила која на покраинските избори во Германија во март 2016 година освои 25 проценти од гласовите.
Фотографија: Reuters/W. Rattay
Марин Ле Пен, Национален фронт (Франција)
Многумина веруваат дека Брегзит и победата на Доналд Трамп може да бидат стимул за Националниот фронт. Со партијата, која беше формирана во 1972 година, раководи Марин Ле Пен, која во 2011 година го презеде водството од нејзиниот татко Жан-Мари Ле Пен. Национален фронт е националистичка партија која користи популистичка реторика да ги промовира своите анти-имиграциски и анти-ЕУ позиции.
Фотографија: Reuters
Герт Вилдерс, Слободарска партија (Холандија)
Лидерот на холандската Слободарска партија, Герт Вилдерс, е еден од најпроминентните десничарски политичари во Европа. Во декември тој беше осуден затоа што во 2014 година праша толпа граѓани дали сакаат повеќе или помалку Мароканци во земјата, но не му беше изречена казна. Неговата партија се смета за анти-ЕУ и антиисламска и моментално има 15 пратеници во холандскиот парламент.
Фотографија: picture-alliance/dpa/S. Koning
Никос Михалолиакос, Златна зора (Грција)
Никос Михалолиакос е претседател на грчката неофашистичка партија Златна зора. Тој и десетина други членови на партијата во септември 2013 година беа уапсени под обвинение за формирање на криминална организација. Михалолиакос беше ослободен во јули 2015 година. Златна зора освои 18 мандати на парламентарните избори во септември 2016 година. Партијата застапува антиимигрантски ставови.
Фотографија: Angelos Tzortzinis/AFP/Getty Images
Габор Вона, Јобик (Унгарија)
Јобик е унгарска антиимиграциска, популистичка и протекционистичка партија која се стреми да биде дел од следната влада во земјата. Јобик е трета по големина политичка партија во Унгарија и на последните избори освои 20 проценти од гласовите. Партијата бара одржување референдум за членството во ЕУ и се залага за криминализација на „сексуалната девијантност“. Лидер на Јобик е Габор Вона.
Фотографија: picture alliance/dpa
Џими Акесон, Шведски демократи
По изборот на Трамп, лидерот на Шведските демократи Џими Акесон во интервју за шведска телевизија изјави: „Постои движење во Европа и САД кое го предизвикува владеењето на естаблишментот. Тоа очигледно се случува и тука“. Шведските демократи бараат ограничување на имиграцијата, се противат на приклучувањето на Турција во ЕУ и бараат референдум за членството на земјата во ЕУ.
Фотографија: AP
Норберт Хофер, Слободарска партија на Австрија
Норберт Хофер, член на австриската националистичка Слободарска партија, загуби на неодамнешните претседателски избори за само 30.000 гласови, откако беше фаворит во првиот круг на гласање. Поранешниот лидер на Зелената партија освои 50,3 проценти од гласовите, а Хофер осови 49,7%. Слободарската партија се залага за зајакнување на државните граници и ограничување на бенефициите на имигрантите.
Фотографија: Reuters/L. Foeger
Мариан Котлеба, Народна партија – Наша Словачка
Лидерот на крајно десничарската Народна партија – Наша Словачка, Мариан Котлеба, изјави: „Дури и еден имигрант е премногу“. Во друга прилика тој го нарече НАТО „криминална организација“. Оваа партија се залага за напуштање на ЕУ и на Еврозоната. На изборите во март 2015 година партијата освои 8 проценти од гласовите, со што обезбеди 14 мандати во националниот парламент кој брои 150 пратеници.
