Големата џамија до вторникот се чистеше темелно за најважниот аџилак во исламот. Во година на корона, меѓутоа, подготовките не опфаќаа само вообичаено чистење и поправки, туку и лепење ленти на подот за држење дистанца околу централното светилиште на исламот - Ќаба.

Онаму каде што во други години десетици илјади верници истовремено ја обиколуваат Ќаба седумпати во обратен правец од стрелките на часовникот, во година на корона бројот на луѓе е многу помал. Верниците го обиколуваат светилиштето оддалечени на растојание од 1,5 метар. Избрани се онлајн, а при пристигнувањето во Мека им се мери телесна температура и мораат две недели во карантин.

Припадниците на безбедносните сили во Мека даваат добар пример и носат маски. Десетиците илјади аџии кои годинава ќе дојдат во Мека потекнуваат од 160 земји, но сите живеат во Саудиска Арабија. Аџилак со авион оваа година не е можен Саудиска Арабија е многу погодена од Ковид-19 - досега има над 250.000 инифицирани лица, а секојдневно се додаваат по 3 до 4 илјади новоинфицирани.

Само муслиманите кои се веќе во земјата смеат да учествуваат на аџилакот годинава. Верниците треба да заминат на аџилак во Мека еднаш во животот - доколку се здрави и полнолетни и „доколку за тоа имаат можност“, се вели во Куранот. Аџилакот е еден од „петте столбови на исламот“.

Дел од аџилакот е и ритуалното каменување на сатаната во Мина, во близина на Мека. И тука годинава мора да се држи неопходна дистанца, па аџиите добиваат специјална опрема прилагодена на време на корона, со дезинфицирани камења за ритуалот на каменување, тепих за молитва и средства за дезинфекција.

Во Големата џамија годинава не само што верниците мора да се на пропишано растојание едни од други, туку тие мора да бидат на отстојание и од Ќаба. Допирање на Ќаба, како досега, годинава е строго забрането.

Вака во Мина, во близина на Мека, работите изгледаа пред само две години. На аџилак во Мека дојдоа повеќе од два милиона муслимани. Покрај религиозното значење, аџилакот има и економско значење. Саудиска Арабија во минатото имаше приходи од над 10 милијарди евра годишно само од аџиите. Во Мека и околината стотици илјади работни места зависат од аџилакот.