Фудбалскиот клуб Барселона нема да смее да потпишува договори со нови играчи до јануари 2016 година, откако ФИФА ја отфрли жалбата на славниот шпански клуб.

ФИФА ги истражуваше трансферите на младите играчи во Барселона реализирани помеѓу 2009 и 2013 година и заклучи дека при доведувањето на 10 млади играчи биле прекршени правилата за заштита на малолетниците, па оттука и казната.

Каталонскиот гигант се жалеше, но жалбата е одбиена, па доколку не успее да ја преиначи одлуката пред Судот за спортска арбитража во Лозана, нема да смее да учествува на трансфер-пазарот во следните два преодни рока.

Барселона е казнета и со 450 илјади швајцарски франци и има рок од 90 дена да ја „регулира ситуацијата со малолетните играчи“.

Казнет е и фудбалскиот сојуз на Шпанија со 500 илјади швајцарски франци поради тоа што не го регулирал системот за трансфер на малолетни играчи.

Трансферите на малолетните играчи можат да се реализираат само доколку нивните родители се доселат во земјата од „нефудбалски причини“. Фудбалерите на возраст меѓу 16 и 18 години можат да играат во Европа доколку се исполнат одредени стандарди за образование и услови за живот.