Американскиот претседател очекува руски напад врз Украина „во наредните денови“. Тој предупреди од последиците од инвазијата. Германскиот канцеларот Шолц сѐ уште гледа шанса за дипломатијата.
Американскиот претседател повторно ја обвини Русија дека создава „лажно оправдание“ за војната против Украина.Фотографија: Jim Watson/AFP/Getty Images
Реклама
Претседателот на САД, Џо Бајден, изјави дека е уверен оти рускиот претседател, Владимир Путин, решил да изврши натамошна инвазија на Украина и дека има „причина да верува“ оти тоа ќе се случи „во наредните денови“, како и дека нападот ќе го опфати и главниот град Киев.
По повеќе недели откако САД зборуваа дека не се сигурни дали Путин донел конечна одлука да тргне во инвазија, Бајден вчера за новинарите изјави дека таа проценка се променила.
„Од овој момент уверен сум оти тој ја донел таа одлука. Имаме причина да веруваме во тоа“, изјави Бајден.
Тој наведе „значителни разузнувачки капацитети“ кои на САД им овозможуваат да ја направат таа проценка.
Живот со конфликт во украинското погранично село Хранитне
02:56
This browser does not support the video element.
Тој ја повтори својата закана за воведување огромни економски и дипломатски санкции ако Русија ја нападне Украина и го повика Путин да ги преиспита своите намери. Бајден рече дека САД и нивните западни сојузници се обединети повеќе од кога било порано да осигураат Русија да ја плати цената за таа инвазија. Бајден, исто така, ѝ порача на Русија дека „не е предоцна“ за дипломатија.
Слична изјава даде и германскиот канцелар Олаф Шолц по телефонскиот разговор со Бајден и со други западни шефови на држави иили влади, како и со претставници на НАТО и на ЕУ.
Германскиот канцелар Олаф Шолц: „Да се држи отворен прозорецот за дипломатија во украинската криза“Фотографија: Michele Tantussi/AP/Pool/picture alliance / ASSOCIATED PRESS
Централната задача сега е „да се држи отворен прозорецот на дипломатијата“. Сепак, со оглед на тоа што повеќе од 150.000 руски војници се распоредени на границата со Украина, постои „многу реален“ ризик од руски напад.
Американскиот претседател, инаку, најави оти државниот секретар на САД, Ентони Блинкен, ќе се сретне со шефот на руската дипломатија, Сергеј Лавров, во четврток наредната недела во Европа.
Владимир Путин: Патот до моќта
Владимир Путин е избран за претседател на Русија во четвртиот мандат. Поглед кон подемот на Путин од нискорангиран агент на КГБ до незапирлива политичка сила.
Фотографија: Reuters/D. Mdzinarishvili
Кадет на КГБ
Роден во Санкт Петербург во 1952, Путин се пријави во советската раразузнувачка служба КГБ веднаш по завршувањето на правниот факултет во 1975. Негова прва задача бил надзорот на странски државјани и вработени во конзулатите во родниот град, тогаш со името Ленининград Потоа замина на служба во Дрезден, источна Германија. Тој наводно запалил стотици документи на КГБ по падот на Берлинскиот ѕид.
Лево на фотографијата, младиот Путин стои до тогашниот градоначалник на Санкт Петербург, Анатоли Собчак. Тој му беше професор на Путин и го назначи за свој советник за меѓународни прашања. И покрај корупцискиот скандал на почетокот од службата, Путин не ја загуби работата, токму поради пријателството со Собчак.
Фотографија: Imago/ITAR-TASS
Метеорски подем
Путин набргу се префрли во Москва. Во 1997 рускиот претседател Борис Елцин му додели среднорангирана функција во неговата администрација- позиција која Путин ќе ја искористи за да создаде важни политички пријателства, кои ќе му бидат од полза во наредните децении.
Фотографија: picture alliance/AP Images
Смртта на пријателот
Путин беше длабоко потресен од смртта на Собчак во 2000 година. Откако ученикот политички го надмина својот учител, Собчак стана гласен поддржувал на кандидатурата на Путин за претседател на Русија. Една година претходно, Путин ги искористи своите врски за да бидат отфрлени обвинувањата против Собчак за проневера.
Фотографија: picture-alliance/dpa/S. Chirikov
Привремен претседател
Во јуни 2000 година, Борис Елцин поднесе оставка, отстапувајќу му на премиерот да стане привремен лидер на државата. За време на успешната претседателска кампања, повторно излегоа на површина обвинувањата за корупција против Путин од времето на неговата служба во Санкт Петербург. Марина Салје, пратеничката која ги изнесе обвинувањата, беше замолчена и принудена да го напушти градот.
Фотографија: Imago/ITAR-TASS
Тандемократија
Кога Путин уставно беше спречен да се кандидира за трет последователен мандат во 2008 година, премиерот Дмитри Медведев се кандидираше на негово место. Кога Медведев беше избран, тој го назначи Путин за премиер. Тоа доведе до критики за „тандемократија“ во Москва и многумина беа убедени дека Медведев е марионета на Путин.
Фотографија: Imago/ITAR-TASS
Победа
Во март 2018 година, Владимир Путин е избран за руски претседател во четврти мандат. Путин ќе биде на власт и во наредните шест години, со оглед дека претседателскиот мандат претходно беше продолжен на шест години. Избоrите беа засенети од обвинувањата за нерегуларности и манипулации, како и од фактот дека немаше вистинска опозиција на Путин.
