Бегалската криза во Европа станува сѐ полоша. Секој ден стотици бегалци од конфликтните региони, како Сирија и Авганистан пристигнуваат на островите во источниот дел на Егејското море. Состојбата е особено драматична на островот Кос, кој е популарна туристичка дестинација.

Вака тие не си ја замислуваа Европа. Всушност бегалците од кризните земји како Сирија и Авганистан на Кос само чекаат на своите патни документи, за да заминат понатаму кон западна Европа.

Малкуте полицајци на островот се целосно преоптоварени. Со апарати за гаснење пожар и со дрвени палки се обидоа да ги растурат насобраните луѓе.

Погледнете го видео-прилогот на оваа тема:

Стотици бегалци доаѓаат на островот Кос , од ден во ден, притоа речиси немаат што да јадат а и местата за спиење се премалку

„Немам пари. Ве молам помогнете ми. сакам да си одам, не сакам да останам во Грција. Сакам да одам во Европа. Јас сум Сиријка, ние имаме големи проблеми“, извикува една разлутена бегалка.

Многу бегалци мораат со недели да спијат на отворено. Вчера властите се обидоа да ги однесат на фудбалскиот стадион на островот. Во метежот на толпата дојде до судири.

„Овде не гледам дека сме во Европа. Гледам дека сме во земја од третиот свет. Нема тоалети, нема вода. Луѓето чекаа повеќе од 10 дена. Што да кажам, ова ли е Европа? Ако ова е Европа, тогаш се вражаме во Сирија.“, вели еден бегалец.

Сѐ повеќе мигранти деновиве доаѓаат во Грција. Околу 124 илјади луѓе само годинава пристигнаа на островите на истокот на Егејското море. Осумкратно повеќе од истиот период лани. Атмосферата на островот Кос се заострува. Градоначалникот предупредува од можно крвопролевање.