Шефицата на германската дипломатија вели дека Берлин е свесен за опасностите кои војната во Украина ги носи за регионот на западниот Балкан.

„По бруталниот напад на Русија врз Украина, ние многу посериозно ги сфаќаме тензиите во регионот“, рече Бербок на прес-конференција по средбата со нејзиниот хрватски колега Горан Грлиќ Радман.

Бербок предупреди дека Русија тврдела оти нема намера да ја нападне Украина пред почетокот на војната, па оттука треба со резерва да се земат и нејзините тврдења дека не работи на дестабилизација на западниот Балкан. Во тој контекст таа ја спомена Босна и Херцеговина како земја која би можела да биде искористена за дестабилизација на целиот регион.

Грлиќ Радман порача дека е важно ЕУ и натаму да ја покажува својата присутност во регионот.
„Се надеваме дека нема да има домино-ефект, но претпазливи сме. Балканот е полигон за геостратешки натпревари и затоа ЕУ тука мора да ја покаже својата сила“, рече Грлиќ Радман во Берлин.