Бизнис - политичко „дефиле“ во СЈО
29 август 2016![](https://static.dw.com/image/19044905_800.webp)
Утрово на распит прво пристигна познатиот бизнисмен и еден од најбогатите Македонци Орце Камчев. Нема информации за кој предмет бил повикан Камчев, а тој не даде изјава по сослушувањето. Името на Камчев не беше директно споменувано во објавените прислушувани материјали од страна на СДСМ, но СЈО на располагање има илјадници други разговори од кои би можело да произлезе сомнеж кон бизнисменот.
Претпладнето, веднаш по Камчев, во СЈО се појави и министерката за култура Елизабета Канческа- Милевска. Ни за неа не се познати детали околу распитот, но се претпоставува дека таа има сознанија за предмет поврзан со проектот „Скопје 2014“. Речиси целата финансиска и проектна конструкција на контроверзниот проект мина преку Министерството за култура.
На 26-ти јули годинава, градоначалникот на скопската општина Центар, Андреј Жерновски во СЈО достави два ревизорски извештаи, изработени на барање на Општината во врска со проектот „Скопје 2014“. Тој тогаш не сакаше да соопшти повеќе детали од исказот во ова обвинителство затоа што се работи за предистражна постапка која е тајна.
Освен Жерновски, минатата недела во СЈО се појавија и лидерот на ДПА Мендух Тачи, поранешната пратеничка од ВМРО-ДПМНЕ, Силвана Бонева и претседателот на ПЦЕР Самка Ибраимовски.
На 15 август годинава, специјалната јавна обвинителка, Катица Јанева најави дека во наредниот период во нејзиното обвинителство ќе има „поголема фреквенцијата на лица“, кои се осомничени или имаат сознанија за предметите на кои работи СЈО.
Од владејачката ВМРО-ДПМНЕ тогаш обвинија дека „Специјалното јавно обвинителство ја стартувало изборната кампања на СДСМ“.