Фармацевтската компанија Бионтек во првите три месеци од годинава остварила профит од над милијарда евра. Сега сака да експандира во Сингапур.
Фотографија: Douglas R. Clifford/Tampa Bay Times/ZUMA/picture alliance
Реклама
Бионтек е без сомневање исклучителна фирма. Фармацевтската компанија од Мајнц го има зголемено својот обрт на средства за 70 пати во споредба со истиот период лани - на речиси две милијарди евра. Профитот, во споредба со претходниот квартал, е поголем за трипати и изнесува 1,1 милијарда евра. Сето тоа, се разбира, е резултат на испораката на вакцини. Досега се испорачани околу 450 милиони дози. „Во врска со нашата вакцина многу ме радува извонредноста на нашиот тим и соработката со нашиот партнер Фајзер. До денес имаме испорачано 450 милиони дози во 91 земја во светот“, изјави шефот и коосновач на Бионтек, Угур Шахин.
Во првиот квартал од минатата година Бионтек наместо добивка од една милијарда евра имаше загуба од околу 50 милиони евра. Тоа се должеше на високите трошоци за истражување и развој. Во моментов фирмата работи пред сѐ на зголемување на производството за да може да се покрие потребата од вакцини во светот. Компанијата зборува за трансформација кон еден биотехнолошки концерн кој работи глобално, кој е специјализиран за вакцини за борба против инфекции и терапии за канцер.
Основачите на Бионтек, Угур Шахин и Озлем ТуречиФотографија: Abdulhamid Hosbas/AA/picture alliance
Централа во Сингапур
Во делот на вакцини Бионтек планира преселба на своето главно седиште во регионот на југоисточна Азија. Во нова фабрика во Сингапур годишно би требало да се произведуваат до една милијарда вакцини. Новата фабрика во Сингапур не е наменета за актуелната пандемија. „Размислувам надвор од границите на Ковид-19. Се надеваме дека ќе можеме да основаме централа за регионално, а можеби и глобално снабдување со низа различни препарати и терапии“, го цитира весникот „Франкфуртер алгемајне цајтунг“ основачот на Бионтек, Шахин.
Притоа се мисли на вакцини и лекови кои ќе се засноваат на новата иРНК-технологија и би требало да се применуваат, меѓу другото, и во борбата против ракот.
Според наводи на основачот на Бионтек, сумата која ќе треба да се инвестира во Сингапур е „стотици милиони американски долари“. Медиумите информираат дека Бионтек добива голема поддршка од државата Сингапур. Тамошната фабрика би требало да почне со работа во 2023 година.
Со централата во Сингапур, Бионтек го прави вториот голем чекор во насока на светска експанзија. Минатата година компанијата го отвори своето американско седиште во Кембриџ, Масачусетс.
Бионтек досега претпазливо соработуваше со Кина. Таму соработува со кинеската фармацевтска компанија Фосун. Фосун во текот на викендот најави дека сака да изгради фабрика за производство до една милијарда вакцини годишно. Бионтек/Фајзер ја очекуваат дозволата за својата вакцина во Кина најдоцна до јули.
Бионтек само што склучи договор за испорака на натамошни 900 милиони вакцини од декември годинава до 2023 година. Покрај тоа, постои опција за уште 900 милиони дози, доколку бидат неопходни. Само за тековнава 2021 година Бионтек има договори за испорака на 1,8 милијарди вакцини.
Сингапур - ново седиште на БионтекФотографија: Yeen Ling Chong/AP Photo/picture-alliance
Дебата за патентите
Додека во Германија има изгледи за сѐ повеќе вакцини, ситуацијата во посиромашните земји е далеку помрачна. Американскиот претседател Џо Бајден предложи временски ограничено укинување на патентите за вакцини, за фирми во погодените земји да можат да произведуваат и самите.
Угур Шахин од Бионтек смета дека тоа нема да доведе до остварување на целта, зашто изградбата на функционални фабрики би траела најмалку една година, а според негова претпоставка дури и подолго. Со новите фабрики, како во Сингапур и Кина, тој гледа шанса за 9 до 12 месеци Бионтек и други производители на вакцини да произведат доволно вакцини за да се покријат потребите во светот.
Слично на работите гледа и експертот за оваа бранша Томас Шисле од компанијата за анализи Equi.ts. „Тоа звучи многу добро во морална смисла, но производството на ваква вакцина е многу комплексен процес. За таков процес да се одржи стабилен и со висок квалитет е потребно време. Подобро е ако може да се зголеми производството на компанијата.“
Вакцини- адути на човештвото против Ковид-19
Глобалната кампања за вакцинација против Ковид-19 зема сѐ поголем замав. Во различни земји, создадени се или на повидок се вакцини, кои сега се главно оружје на човештвото во справувањето со пандемијата.
Фотографија: Francis Dean/Dean Pictures/imago images
Бионтек/Фајзер: почеток на иРНК-револуцијата
Првата вакцина против Ковид-19, одобрена за употреба во САД и во ЕУ, беше вакцината на германските научници со турски корени Угур Шахин и неговата сопруга Озлем Туречи. Нивната фирма Бионтек од Мајнц влезе во сојуз со американскиот гигант Фајзер. Медиумите почнаа да зборуваат за „револуција“ во фармацевтската индустрија, откако е создадена првата иРНК вакцина.
Фотографија: Francis Dean/Dean Pictures/imago images
Модерна: родум од универзитетот Харвард
Американската компанија за биотехнологија Модерна е специјализирана и за РНК технологии, кои се сметаат за нов чекор во медицината. Нејзиното седиште се наоѓа во Кембриџ, Масачусетс, во близина на универзитетот Харвард, чии научници ја основаа компанијата во 2010 година. Вакцината на Модерна, создадена со финансиска поддршка од властите, беше втората корона-вакцина регистрирана во САД и во ЕУ.
Фотографија: Matthew Healey/AFP/Getty Images
АстраЗенека: „Оксфордската вакцина“
Научниците од Универзитетот Оксфорд во соработка со британско-шведската компанија АстраЗенека вршеа клинички испитувања и производство на нивната вакцина. Таа во голема мерка се користи во Велика Британија, ги исполнува условите во ЕУ и активно се користи во земјите во развој, бидејќи „вакцината од Оксфорд“ има многу ниска цена. Така, таа се произведува во Индија за локалниот пазар и за извоз.
Фотографија: Channi Anand/AP/picture alliance
Спутник V: првата одобрена вакцина во светот
Во август 2020, Русија објави дека прва во светот регистрирала вакцина против коронавирусот наречена Спутник V. Масовната вакцинација на руското население официјално започна во јануари 2021. Оваа векторска вакцина, изработена од научниците од Московскиот центар Гамалеја, се промовира на странските пазари од страна на Рускиот фонд за директни инвестиции.
Фотографија: Aizar Raldes/AFP/Getty Images
Џонсон и Џонсон: доволна е една доза
Американска корпорација Џонсон и Џонсон е еден од шесте производители на корона-вакцини со кои ЕУ склучи прелиминарни договори за снабдување. Од нејзината векторска вакцина потребна е само една доза, а не две како останатите и се чува во конвенционални фрижидери. За ЕУ оваа вакцина, која доби дозвола за употреба на 11.03. ќе ја произведува белгиската сестринска фирма на Џонсон и Џонсон - Јансен.
Фотографија: Johnson/AP/picture alliance
Синовак: тивкиот конкурент од Кина
Без многу врева и детални извештаи за клиничките испитувања, Кина разви најмалку три вакцини. Една од нив, создадена од деактивиран коронавирус, Синовак Биотек ја тестираше во неколку азиски земји, вклучувајќи ја и Индонезија, која потоа веднаш ја нарача. Да им даде пример на своите сонародници, претседателот на Индонезија, Џоко Видодо, прв се вакцинираше.
Фотографија: Laily Rachev/Biro Pers Sekretariat Presiden
Синофарм: Првата кинеска вакцина
Станува за вакцина со „деактивиран“ вирус која државната компанија ја разви во соработка со Институтот за вирологија од Вухан. Овој вид на вакцини се користи веќе со децении, со добри резултати во пракса. Вакцината која веќе се користи во Србија и во Унгарија, беше првата која доби одобрение за употреба од кинеските власти.
Американската фармацевтска компанија Новавакс објави дека нејзината вакцина е 96 процентно ефикасна против оригиналниот вирус и 86 проценти против британскиот сој. Тоа произлегува од студијата што Новавакс ја спроведуваше во Велика Британија. Вакцината може да биде одобрена за употреба во САД уште во мај, доколку властите утврдат дека податоците од Велика Британија се доволни, соопшти компанијата.
Фотографија: Justin Tallis/AFP/ Getty Images
КјурВак: Печатач за вакцини на Тесла
Втората германска иРНК вакцина, која се очекува да биде регистрирана до лето, ќе биде произведена и извезена на глобално ниво од компанијата КјурВак од Тибинген, во партнерство со концернот Баер. Но, ќе биде можно таа да се направи директно во клиниките ширум светот. Елон Маск (втор од лево) демонстрираше мобилен печатач на вакцини создаден од германската сестринска фирма Тесла Громан.
Фотографија: picture-alliance/dpa/T. Schwarz
Санофи: два неуспеха и помош за Европска унија
Француската компанија Санофи е еден од најголемите светски производители на вакцини. Но, овојпат тоа не и' успеа - двапати: ни заедничкиот развој со британската ГлаксоСмитКлајн, ниту обидот за создавање иРНК вакцина досега не дадоа резултати. За да помогне во обезбедувањето на вакцини за земјите од ЕУ, нејзината фабрика во Франкфурт на Мајна ќе произведе 125 милиони дози од вакцината на Фајзер.
