„Битка“ за Венецуела во Советот за безбедност на ОН
СН/ агенции
11 април 2019
САД побараа од највисокото тело на Светската организација да го признае Хуан Гуаидо за претседател на Венецуела. Амбасадорот на земјата во ОН пак тврди дека Вашингтон подготвува инвазија на земјата.
Фотографија: Reuters/B. McDermid
Реклама
Во борбата за превласт во Венецуела, САД сега играат на ОН-картата за да го отстранат претседателот Николас Мадуро од функцијата. Американскиот потпретседател Мајк Пенс го повика Советот за безбедност на Обединетите нации официјално да го признае самопрогласениот претседател на Венецуела, Хуан Гуаидо, за шеф на државата. Вашингтон во моментов работи на соодветна нацрт-резолуцијата, изјави Пенс на седница на Советот за безбедност на ОН во Њујорк.
Пенс уште порача дека актуелниот амбасадор на Венецуела во ОН мора да биде лишен од признавањето, и директно му се обрати на дипломатот Самуел Монкада. „Со сета почит, г-дине амбасадор, Вие не треба да бидете тука, треба да се вратите во Венецуела и да му кажете на Николас Мадуро дека е време тој да замине".
Фотографија: Reuters/C.G. Rawlins
„САД подготвуваат терен за инвазија“
Пенс потврди дека САД ќе продолжат да вршат економски и дипломатски притисок врз Венецуела за да обезбедат „мирна транзиција". Истовремено, потпретседателот повторно нагласи: „Сите опции се на маса".
Амбасадорот на Венецуела во ОН, Самуел Монкада, возврати со обвинување дека американската влада ѝ се заканува на неговата земја со војна и оти се подготвува терен за инвазија.
Според него, хуманитарната криза во Венецуела е директен плод на планот за економско уништување кој го составиле САД и Велика Британија. Целта е предизвикување на социјална имплозија која можат да ја искористат како повод за воена интервенција и воспоставување на марионетска влада која би ја предводел опозицискиот лидер Хуан Гуаидо, рече амбасадорот на Венецуела во ОН.
Кој е кој во кризата во Венецуела
Ситуацијата во јужноамериканската држава зоврива. Кои се клучните политички играчи и институции во кризата која се заканува да ескалира во граѓански судир? Повеќе во следнава галерија.
Фотографија: Getty Images/AFP/F. Parra
Хуан Гуаидо
35-годишниот политичар беше релативно непознат сѐ до преземањето на функцијата претседател на националното собранието, во кое мнозинство има опозицијата. Тој сега се самопрогласи за преоден претседател и го осуди владеењето на Мадуро како „нелегитимно". Гуаидо стаса до врвот на поделената опозиција откако клучните личности беа затворени, ставени во куќен притвор или ја напуштија земјата
Фотографија: Reuters/C. Garcia Rawlins
Николас Мадуро
Социјалистичкиот претседател владее со земјата откако во 2013 година извојува тесна победа на спорните избори по смртта на неговиот политички ментор Хуго Чавез. Мадуро ја консолидираше контролата врз клучните државни институции, вклучително и Врховниот суд, војската и државната нафтена компанија. Но економијата колабираше, граѓаните западнаа во сиромаштија, а милиони ја напуштија земјата.
Фотографија: picture-alliance/dpa/A. Cubillos
Армијата на Венецуела
Првите луѓе на војската на Венецуела досега го поддржуваа Мадуро и покрај повиците на опозицијата војската да застане на страната на народот. Деновиве имаше мал бунт, а Гуаидо вети амнестија за војниците кои помогнале да се собори Мадуро. Тој, пак, работеше напорно за да ја придобие војската на своја страна, поставувајќи воени офицери на клучни владини позиции и во државната нафтена компанија.
Фотографија: picture-alliance/AP/R. Mazalan
Национално контра конститутивно собрание
Националното собрание во 2017 година е суспендирано од Врховниот суд под контрола на Мадуро и заменето со провладино конститутивно собрание чија цел е да го преработи уставот. Опозицијата ги бојкотираше изборите за конститутивното собрание во јули 2017 година, тврдејќи дека со ова илегално се узурпира моќта на законодавниот дом.
Фотографија: Getty Images/AFP/F. Parra
Граѓаните на Венецуела
Политичкиот раскол и острите поделби на два табора речиси како во огледало се отсликуваат и меѓу луѓето во Венецуела. Тензиите растат како во Каракс, така и во другите градови во земјата со оглед дека и приврзаниците и противниците на Мадуро излегуваат на улиците. Според наводите на невладините организации, во насилствата во земјата секојдневно има загинати и повредени.
