Доколку безбедносните служби дејствувале „консеквентно“, оценува политичарот на Христијанско-демократската унија Волфганг Бозбах, можеби немало да се случи серијата убиства. По седницата на Комисијата за внатрешна политика на Бундестагот, чиј претседател е, Бозбах изјави дека во случајот имало „низа погрешни проценки“ и непреземање „неопходни мерки“.

Бозбах денеска се заложи за поврзување на покраинските ограноци на тајните служби. Сојузниот министер за внатрешни работи Ханс-Петер Фридрих, пак, се изјасни за префрлање на дел од компетенциите на покраинските тајни служби на сојузно ниво.

За натамошно разјаснување на пропустите кои се направени во текот истрагата за неонацистичката група од Цвикау можеби ќе биде формирана истражна комисија, ќе биде именуван независен иследник или пак експертска група. Мислењата на членовите на Комисијата за внатрешни работи на парламентот денеска се разликуваа околу тоа кое тело би било најсоодветно и најефикасно.

Комисијата за внатрешни работи на Бундестагот се информира околу состојбата во истрагата за ќелијата од Цвикау, која од 2000 година досега е осомничена за најмалку десет убиства. Најголемиот дел од жртвите се мигранти. Утре со темата ќе се занимава и Бундестагот, на пленарна седница.

Автор: ЕМФ/дапд/ртр

Редактор: Г. Чутаноски