Маглај е град со 25.000 жители во северна Босна. Кој останал овде се обидува да спаси што може да се спаси. Откако реката Босна поплави речиси сѐ, владее хаос и очај: „Состојбата е многу тешка“, вели Ениса Ѓаниќ. „Сѐ беше под вода - мојот стан, мојата мала продавница, автомобилот - сѐ. Пред 20 години како бегалец од војната тука дојдов од Добој. Сѐ што имав тогаш беше уништено. И сега повторно. Не знам како натаму“.

Златан Латифовиќ, кој е израснат во Германија, исто така вели: „Во Маглај состојбата е лоша, ништо не функционира. Страшно е, немаме вода, немаме ништо тука. Сѐ е поплавено“.

„Катастрофално е, ова е поплава на столетието“

На прашањето што сѐ загубил, Златан Латифовиќ вели: „Како може тоа да се пресмета? Целиот долен кат на куќата го нема. Значи сѐ е потопено, сѐ може да се фрли. Целата електроинсталација. Катастрофално е, ова е поплава на столетието. Хуманитарна помош доаѓа, но мора да биде координирана“. И тој информира дека има грабежи: „Сите земаат по нешто“, вели тој и дополнува: „Луѓето крадат, што да ви кажам“.

Босна е една од најсиромашните земји во Европа, еден милион луѓе се погодени од поплавите, повеќе од една четвртина од жителите на земјата. Водостојот на многу места во Босна и во Србија полека се намалува, но и натаму демнат опасности. Од една страна, поради лизгање на земјиштето, во планинските предели се заканува уништување на куќи поради тоа што земјата е многу омекната. Властите исто така предупредија од ширење на заразни болести, а тука е и проблемот со мините, кои поплавите ги изместија. И во Маглај жителите во калта на опустошените имоти веќе најдоа неексплодирани мини.

„Обреновац веќе не постои“

Во Србија, градот Обреновац, кој се наоѓа непосредно пред Белград, е најсилно погоден од поплавите. Тука беа пронајдени дванаесет жртви. „Обреновац веќе не постои“, со треперлив глас вели една жена, која навреме можеше да избега од поплавата.

Крај Обреновац се наоѓа и најголемата термоцентрала на Србија, „Никола Тесла“, која исто така е погодена од поплавите и сега може само делумно да работи. Затоа владата во Белград уште повеќе е загрижена за втората голема термоцентрала, Костолац, поради заканата за излевање на реката Млава.

Властите во Србија и во Босна очекуваат зголемување на бројот на жртвите. Српскиот премиер Александар Вучиќ се заблагодари за досега пружената помош од Србија, од соседите, од Русија и голем број ЕУ-држави. Истовремено, тој побара натамошна хуманитарна помош, како вода за пиење, храна за деца, пелени, облека, лекови и средства за дезинфекција.