Желбата на британската влада е излез од ЕУ, но на каков начин? Под какви услови? Кои ќе бидат последиците? Дел од одговорите можеби ќе ги даде втората рунда преговори во Брисел.
Од денеска во Брисел ќе се преговара поинтензивно околу Брегзит. Претстојат тешки недели и месеци, за преговарачите, но и за сите други за кои исходот е од исклучително значење.
Разговорите во рамките на вториот преговарачки круг треба да траат до четврток. Предводникот на преговарачкиот тим на ЕУ, Мишел Барние ( на фотографијата лево) и британскиот министер за Брегзит Дејвид Дејвис (десно), меѓу другото ќе дискутираат за идниот правен статус на ЕУ-граѓаните кои живеат во Велика Британија, финансиските побарувања на ЕУ кон Велика Британија, како и статусот на британската провинција Северна Ирска. Тоа се топ-темите, кои според желбата на ЕУ, треба да бидат завршени до наесен.
Британската страна не се согласува во иднина споровите со ЕУ да завршуваат пред Европскиот суд во Луксембург. Велика Британија сѐ уште нема заземено конкретна позиција во однос на останатите ЕУ-приоритети. Меѓутоа, Лондон би сакал што поскоро да се зафати со склучувањето иден трговски договор со ЕУ. Брисел меѓутоа има поинакво рангирање на темите: разговори околу идните односи дури откако ќе бидат во основа расчистени најважните прашања поврзани со заминувањето на Британците од Унијата.
Британија неизбежно ја напушта ЕУ во есента 2019. година. Првата рунда преговори на крајот на јуни беше само сондирање на расположението, битката за деталите ќе биде отежната и со новата ситуација на владата на Тереза Меј - малцинска влада. Британската премиерка досега инсистираше на т. н. тврд Брегзит, јасен рез меѓу Британија и континентот. Но, во меѓувреме дури и од нејзиниот кабинет доаѓаат покротки тонови.
Така на пример, министерот за финансии, Филип Хамонд изјави дека најголем дел од членовите на владата се наклонети кон преодна фаза во истапувањето од ЕУ. Само до пред пет недели оваа идеја беше комплетно нова, но сега е прифатлива за веќе речиси сите членови во владиниот кабинет, констатираше тој во разговор за Би-Би-Си.
Збогум Британија, ние си заминуваме...
Британските компании многу пати предупредуваа за потенцијалните негативни последици по економијата од Брегзит. По референдумот за напуштање на ЕУ, некои компании размислуваат да ги релоцираат компаниските седишта.
Фотографија: picture-alliance/dpa/W. Kumm
Водафон
Втората по големина компанија за мобилна телефонија во светот ја разгледува опцијата да го премести своето седиште надвор од Британија по Брегзит. Диселдорф би можел да биде една од опциите за новото седиште на компанијата. Водафон веќе е присутна во германскиот град каде вработува околу 5.000 луѓе, исто така, Германија е најголемиот пазар на компанијата.
Фотографија: Getty Images/AFP/M. Hayhow
Рајанер
Најголемата авиокомпанија за ефтини летови во Европа официјално е регистрирана во Ирска, но голем дел од нејзината флота е лоцирана во Британија. Но, тоа може наскоро да се смени – од Рајанер најавуваат дека своите летала повеќе нема да ги стационираат таму.
Фотографија: picture-alliance/dpa/M. Scholz
Изиџет
Втората по големина авиокомпанија за ефтини летови во Европа е базирана во Лондон, но, до кога? „За тоа ќе видиме“, изјави извршната директорка на компнанијата Керолин Мек Кол во телевизиско интервју. Изиџет е една од најпрофитабилните компании во Европа.
Фотографија: Getty Images/AFP/F. Guillot
Вирџин
Ричард Бренсон е еден од најпознатите бизнис личности во Британија. За Брегзит тој изјави: „Британија е насочена кон економска катастрофа“. Неговиот конгломерат изгуби една третина од вредноста по референдумот во земјата. Бренсон ја повика владата да организира втор референдум.
Фотографија: Getty Images/AFP/D. Leal-Olivas
ЏејПиМорган Чејс
Најголемата банка во САД вработува околу 16.000 луѓе во Лондон. Но, менаџментот сега разгледува повеќе можности да премести дел од операциите надвор од Британија. Извршниот директор на банката, Џејми Димон, пред референдумот изјави дека помеѓу 1.000 и 4.000 работни места може да бидат преместени надвор од Лондон доколку се случи Брегзит.
Фотографија: Getty Images/C.Gillon
Виза
Оваа компанија ќе нема голем избор освен да го намали бројот и обемот на активностите во Британија, што ќе доведе до кратење на стотици работни места. Според регулативата на ЕУ, компанијата мора да одржува центар за податоци во земја на ЕУ. Што практично ќе значи крај за податочниот центар на компанијата во Лондон.
Фотографија: Imago
Форд
Од Форд неколку пати изјавија дека Британија е „клучен пазар“ за компанијата во Европа. Фабриката на Форд во Дагенхам произведува делови и мотори за филијалите на компанијата во Германија. По одлуката за напуштање на ЕУ, од Форд изјавија дека компанијата ќе ги преземе сите потребни мерки да остане конкурентна на пазарот.
Фотографија: picture-alliance/dpa
Јагуар Ленд Ровер
Сепак, сите компании не се песимисти. „Ние сме Британци и стоиме зад Британија“, изјави Едријан Халмарк, одговорен за стратегии во Јагуар Ленд Ровер. Нема промени во нашите бизнис планови, уверува Халмарк за периодот од следните две години во кои Британија со сигурност ќе остане дел од ЕУ.
