Брегзит: ЕУ го одобри „трагичниот“ развод со Британија
БГ
25 ноември 2018
Лидерите на земјите-членки на ЕУ во Брисел го одобрија договорот за заминување на Британија. Но британската премиерка Тереза Меј се уште треба да добие одобрение од британскиот парламент
Фотографија: Reuters/Y. Herman
Реклама
Лидерите на 27 земји-членки на ЕУ во неделата го прифатија договорот со кој се утврдуваат условите за заминување на Британија од блокот на 19 март 2019 година.
Договорот регулира како Британија може да остане во тесни врски со ЕУ пазарот по период на транзиција од две до четири години. Договорот исто така ги опфаќа финансиските прашања, правата на граѓаните и влијанието на Брегзит врз Северна Ирска, но отвора и простор за идни безбедносни и трговски врски меѓу ЕУ и Британија.
Преговорите за документот на 585 страници траеја до последен момент, и беа проследени со жестоки критики од евроскептиците како и про-ЕУ политичарите во Британија. Во текот на викендот беше надминат и проблемот со Гибралтар кој го актуелизираше Шпанија.
Претседателот на Советот на ЕУ, Доналд Туск ги повика земјите на ЕУ да го одобрат договорот кој беше постигнат по 17 месечни тешки преговори. Туск оцени дека договорот ќе „ги намали ризиците и загубите“ откако Брегзит ќе биде завршен.
Претседателот на Европската Комисија Жан Клод Јункер рече дека Брегзит не е „момент за радост и славје“.
„Ова е тажен момент и трагедија“, изјави Јункер.
Но, и покрај одобрувањето на ЕУ лидерите, договорот мора да биде изгласан во Британскиот парламент каде многу пратеници, вклучително и од конзервативната партија на премиерката Тереза Меј, жестоко се спротивставуваат.
Дел од поддржувачите на Брегзит се противат на делот на договорот кој спречува повторно поставување на цврста граница меѓу Северна и Република Ирска.
Евроскептиците, пак, сметаат дека со договорот Британија останува премногу блиску до ЕУ.
Во отворено писмо, премиерката Меј порача дека договорот „е во наш национален интерес“. Таа оцени дека Брегзит може да биде „момент на обнова и помирување“.
Збогум Британија, ние си заминуваме...
Британските компании многу пати предупредуваа за потенцијалните негативни последици по економијата од Брегзит. По референдумот за напуштање на ЕУ, некои компании размислуваат да ги релоцираат компаниските седишта.
Фотографија: picture-alliance/dpa/W. Kumm
Водафон
Втората по големина компанија за мобилна телефонија во светот ја разгледува опцијата да го премести своето седиште надвор од Британија по Брегзит. Диселдорф би можел да биде една од опциите за новото седиште на компанијата. Водафон веќе е присутна во германскиот град каде вработува околу 5.000 луѓе, исто така, Германија е најголемиот пазар на компанијата.
Фотографија: Getty Images/AFP/M. Hayhow
Рајанер
Најголемата авиокомпанија за ефтини летови во Европа официјално е регистрирана во Ирска, но голем дел од нејзината флота е лоцирана во Британија. Но, тоа може наскоро да се смени – од Рајанер најавуваат дека своите летала повеќе нема да ги стационираат таму.
Фотографија: picture-alliance/dpa/M. Scholz
Изиџет
Втората по големина авиокомпанија за ефтини летови во Европа е базирана во Лондон, но, до кога? „За тоа ќе видиме“, изјави извршната директорка на компнанијата Керолин Мек Кол во телевизиско интервју. Изиџет е една од најпрофитабилните компании во Европа.
Фотографија: Getty Images/AFP/F. Guillot
Вирџин
Ричард Бренсон е еден од најпознатите бизнис личности во Британија. За Брегзит тој изјави: „Британија е насочена кон економска катастрофа“. Неговиот конгломерат изгуби една третина од вредноста по референдумот во земјата. Бренсон ја повика владата да организира втор референдум.
Фотографија: Getty Images/AFP/D. Leal-Olivas
ЏејПиМорган Чејс
Најголемата банка во САД вработува околу 16.000 луѓе во Лондон. Но, менаџментот сега разгледува повеќе можности да премести дел од операциите надвор од Британија. Извршниот директор на банката, Џејми Димон, пред референдумот изјави дека помеѓу 1.000 и 4.000 работни места може да бидат преместени надвор од Лондон доколку се случи Брегзит.
Фотографија: Getty Images/C.Gillon
Виза
Оваа компанија ќе нема голем избор освен да го намали бројот и обемот на активностите во Британија, што ќе доведе до кратење на стотици работни места. Според регулативата на ЕУ, компанијата мора да одржува центар за податоци во земја на ЕУ. Што практично ќе значи крај за податочниот центар на компанијата во Лондон.
Фотографија: Imago
Форд
Од Форд неколку пати изјавија дека Британија е „клучен пазар“ за компанијата во Европа. Фабриката на Форд во Дагенхам произведува делови и мотори за филијалите на компанијата во Германија. По одлуката за напуштање на ЕУ, од Форд изјавија дека компанијата ќе ги преземе сите потребни мерки да остане конкурентна на пазарот.
Фотографија: picture-alliance/dpa
Јагуар Ленд Ровер
Сепак, сите компании не се песимисти. „Ние сме Британци и стоиме зад Британија“, изјави Едријан Халмарк, одговорен за стратегии во Јагуар Ленд Ровер. Нема промени во нашите бизнис планови, уверува Халмарк за периодот од следните две години во кои Британија со сигурност ќе остане дел од ЕУ.
