Патот е конечно трасиран: британската премиерка Тереза Меј официјално побара излез на земјата од ЕУ. Сега почнуваат двегодишните преговори за Брегзит.
Фотографија: Getty Images/AFP/Y. Herman
Реклама
Британскиот амбасадор во ЕУ Тим Бороу денеска во Брисел му го предаде барањето за активирање на членот 50 од Римските договори, со кој се регулира истапувањето, на претседателот на Советот на ЕУ, Доналд Туск. „По девет месеци, Велика Британија достави барање“, напиша Туск на Твитер.
„Нема никаква причина денешниот ден да го сметаме за среќен, ниту овде во Брисел, ниту во Лондон“, изјави Туск пред новинарите. Приоритет во овој момент е ограничување на штетите. Но, парадоксално, дополни Туск, е што Брегзит носи и нешто позитивно, го засилува заедништвото на останатите ЕУ-членки.
Британската премиерка Тереза Меј синоќа го потпиша документот со кој официјално се бара разделба од ЕУ. Велика Британија станува првата членка која ја напушта Унијата. На референдумското изјаснување во јуни минатата година, 51,9 проценти од Британците гласаа за Брегзит, 48,1 проценти беа за останување во ЕУ.
Тереза Меј го потпиша барањето за БрегзитФотографија: REUTERS/C. Furlong
Сега е отворен патот за двегодишните преговори, во кои треба да се „расплетат“ врските меѓу Велика Британија и ЕУ. Во процесот треба да бидат опфатени околу 20.000 закони. Членството на Лондон во Унијата ќе заврши веројатно во март 2019. година. Останатите 27 ЕУ-држави ќе ги усогласат своите преговарачки позиции на вонреден самит на 29. април. Конечна согласност на крајот треба да дадат Европскиот парламент и Советот на ЕУ, а Тереза Меј дефинитивниот договор ќе го поднесе во британскиот парламент. Силна ЕУ е во британски интерес и по Брегзитот, изјави Меј во денешното обраќање пред законодавниот дом во Лондон. Таа ги повика своите сограѓани на единственост, иако денешниот ден за едни е повод за славје, а за други - за разочарување.
Меј очекува напуштањето на ЕУ да тече без проблеми и координирано и излезните преговори да завршат во предвидениот рок од две години, по што би настапила фаза на примена на новиот договор. Во поранешен говор Меј се закануваше дека Велика Британија порадо би извршила нерегулиран излез од ЕУ, откако да прифати лош по земјата договор.
Британските компании многу пати предупредуваа за потенцијалните негативни последици по економијата од Брегзит. По референдумот за напуштање на ЕУ, некои компании размислуваат да ги релоцираат компаниските седишта.
Фотографија: picture-alliance/dpa/W. Kumm
Водафон
Втората по големина компанија за мобилна телефонија во светот ја разгледува опцијата да го премести своето седиште надвор од Британија по Брегзит. Диселдорф би можел да биде една од опциите за новото седиште на компанијата. Водафон веќе е присутна во германскиот град каде вработува околу 5.000 луѓе, исто така, Германија е најголемиот пазар на компанијата.
Фотографија: Getty Images/AFP/M. Hayhow
Рајанер
Најголемата авиокомпанија за ефтини летови во Европа официјално е регистрирана во Ирска, но голем дел од нејзината флота е лоцирана во Британија. Но, тоа може наскоро да се смени – од Рајанер најавуваат дека своите летала повеќе нема да ги стационираат таму.
Фотографија: picture-alliance/dpa/M. Scholz
Изиџет
Втората по големина авиокомпанија за ефтини летови во Европа е базирана во Лондон, но, до кога? „За тоа ќе видиме“, изјави извршната директорка на компнанијата Керолин Мек Кол во телевизиско интервју. Изиџет е една од најпрофитабилните компании во Европа.
Фотографија: Getty Images/AFP/F. Guillot
Вирџин
Ричард Бренсон е еден од најпознатите бизнис личности во Британија. За Брегзит тој изјави: „Британија е насочена кон економска катастрофа“. Неговиот конгломерат изгуби една третина од вредноста по референдумот во земјата. Бренсон ја повика владата да организира втор референдум.
Фотографија: Getty Images/AFP/D. Leal-Olivas
ЏејПиМорган Чејс
Најголемата банка во САД вработува околу 16.000 луѓе во Лондон. Но, менаџментот сега разгледува повеќе можности да премести дел од операциите надвор од Британија. Извршниот директор на банката, Џејми Димон, пред референдумот изјави дека помеѓу 1.000 и 4.000 работни места може да бидат преместени надвор од Лондон доколку се случи Брегзит.
Фотографија: Getty Images/C.Gillon
Виза
Оваа компанија ќе нема голем избор освен да го намали бројот и обемот на активностите во Британија, што ќе доведе до кратење на стотици работни места. Според регулативата на ЕУ, компанијата мора да одржува центар за податоци во земја на ЕУ. Што практично ќе значи крај за податочниот центар на компанијата во Лондон.
Фотографија: Imago
Форд
Од Форд неколку пати изјавија дека Британија е „клучен пазар“ за компанијата во Европа. Фабриката на Форд во Дагенхам произведува делови и мотори за филијалите на компанијата во Германија. По одлуката за напуштање на ЕУ, од Форд изјавија дека компанијата ќе ги преземе сите потребни мерки да остане конкурентна на пазарот.
Фотографија: picture-alliance/dpa
Јагуар Ленд Ровер
Сепак, сите компании не се песимисти. „Ние сме Британци и стоиме зад Британија“, изјави Едријан Халмарк, одговорен за стратегии во Јагуар Ленд Ровер. Нема промени во нашите бизнис планови, уверува Халмарк за периодот од следните две години во кои Британија со сигурност ќе остане дел од ЕУ.
