Трамп има противници дури и во Белата куќа - цела редица негови високорангирани соработници работат активно и целно против него, се тврди во анонимна колумна во весникот „Њујорк тајмс“.
Весникот „Њујорк тајмс“ објави гостински текст од анонимен автор, во кој буквално се вели: „Дилемата, која тој (Трамп, н.з) не ја сфаќа целосно, е дека бројни истакнати службеници во неговата влада непрекинато работат на спречување на делови од неговата политика и неговите најпогубни идеи.“ Авторот на текстот под наслов „Јас сум дел од отпорот во владата на Трамп“, а кој предизвика големи бранувања, истакнува: „Добро го знам тоа, зашто јас сум еден од нив.“
Весникот го објави текстот без потпис, но тврди дека му е познат идентитетот на авторот, кој сака да остане анонимен додека е на функција.
Авторот ја нагласува својата приврзаност кон политиката на Републиканската партија, наспроти Демократите, образложувајќи ги мотивите: „Веруваме дека во прв ред сме обврзани кон нашата земја, а претседателот и натаму работи на начин кој штети на доброто на нашата држава. Затоа, спремни сме да направиме сѐ што можеме заради зачувување на нашите демократски институции и за да ги оневозможиме најчесто погрешните импулси на господинот Трамп, додека тој сѐ уште е на позицијата.“
„Иако беше избран како Републиканец, претседателот покажува малку афинитет кон идеалите што долго време се поставени од конзервативците: слободен ум, слободни пазари и слободни луѓе. Во најдобар случај тој се повикува на тие идеали како да се дел од претходно напишано сценарио. Во најлош случај, тој ги напаѓа,“ наведува авторот на текстот.
Текстот се појавува само два дена откако беше објавена нова книга на американската новинарска легенда, Боб Вудворд, во која тој исто така тврди - голем дел од администрацијата на Трамп е концентрирана врз напорите да го одврати претседателот од уништување на светскиот трговски систем, од руинирање на националната безбедност и провоцирањето војни. Анонимната колумна во „Њујорк тајмс“ навестува дека отпорот во Белата куќа е уште посилен од оној кој го опишува Вудворд. Трамп преку Твитер остро ги демантираше наводите во книгата на Вудворд, обвинувајќи го репортерот за целно ширење лаги, а на текстот во „Њујорк тајмс“ реагираше со еден единствен збор на Твитер, напишан со големи букви: „Предавство?“
'You're fired' - Жртвите на администрацијата на Трамп
Американскиот претседател Доналд Трамп ги отпушта високите функционери во Белата Куќа побрзо отколку што можете да кажете "covfefe“. Еве ја листата на неговите досега отпуштени соработници
Со твит на 22 март, Трамп најави дека го заменува Мекмастер со Џон Болтон како негов советник за национална безбедност. Почитуван генерал, Мекмастер најави дека се повлекува од армијата и од јавната служба. Трамп и Мекмастер имале различни погледи за бројни прашања.
Фотографија: Imago/photothek/F. Gaertner
Рекс Тилерсон
Поранешен директор на Ексон, Тилерсон беше државен секретар едвај повеќе од една година. Трамп го отпушти Тилерсон со цел да формира „нов тим“ во пресрет на разговорите со Северна Кореја, признавајќи дека со Тилерсон „имале недоразбирања за нешта“. Нивните односи отидоа по надолна линија откако Тилерсон го нарече Трамп „морон“ во 2017.
Фотографија: picture-alliance/dpa/J. Ernst
Гери Кон
Ветеранот од Голдман Сакс, му беше главен економски советник на Трамп. Тој ги избутка даночните реформи во 2017. Но, Кон си поднесе оставка во март 2018 откако не успеа да го убеди Трамп да не воведува заштитни царини за увоз на челик и алуминиум.
Фотографија: Getty Images/D. Angerer
Хоуп Хикс
Таа поднесе оставка од функцијата директор за комуникации на Белата Куќа на крајот на февруари. Ден пред оставката, Хоуп сведочеше во Конгресот за мешањето на Русија во изборите. Призна дека кажувала „шарени лаги“ во корист на Трамп, но не во врска со Русија. Белата Куќа инсистира дека оставката не била поврзана со сведочењето.
Фотографија: Reuters/L. Millis
Роб Портер
Секретарот на персоналот на Белата Кужа поднесе оставка откако поранешните сопруги го обвинија за домашно насилство. Тој ги демантираше обвинувањата. Трамп го бранеше Порер, а американските медиуми се прашуваа како воопшто ги минал тестовите за вработување. Се шпекулира дека е во романтична врска со Хоуп Хикс.
Фотографија: Getty Images/AFP/N. Kamm
Стивен Бењон
Тој имаше клучна улога во победата на Трамп на изборите, но мораше да замине по само една година. Бењон се залагаше за економски национализам и ја промовираше стратегијата „Америка на прво место“.
Фотографија: picture alliance/AP Photo/A. Brandon
Ентони Скарамучи
Поранешниот хеџ-фонд инвеститор беше директор за комуникации само 10 дена. Трамп беше незадоволен од неговиот медиумски напад врз колегите од тимот на претседателот.
Поранешниот шеф на кабинет во Белата Куќа беше принуден на оставка само шест месеци откако дојде на функцијата, по јавниот судир со Ентони Скарамучи. Прибус беше еден од функционерите кои се противеле на именувањето на Скарамучи.
Фотографија: Reuters/M. Segar
Шон Спајсер
Спајсер имаше затегнати односи со претседателот, но и со медиумите, а поднесе оставка откако директно му кажал на Трамп дека остро се спротивставува на именувањето на Скарамучи за директор за комуникации на Белата Куќа.
Фотографија: Reuters/K.Lamarque
Мајкл Дубке
Поранешниот директор за комуникации на Белата Куќа беше принуден на оставка во мај 2017 година, откако беше критикуван поради слабата контрола на скандалот со руското мешање во изборите во САД.
Фотографија: picture-alliance/AP Photo/S. Walsh
Џејмс Коми
Претседателот Трамп го отпушти директорот на ФБИ, Коми- наводно поради лошото водење на истрагата за електронската пошта на Хилари Клинтон. Но, критичарите веруваат дека отказот се должел на истрагата на ФБИ за врските на Трамп со Русија.
Фотографија: picture-alliance/AP Photo/J. S. Applewhite
Мајкл Флин
Именуван како прв советник на Трамп за национална безбедност, Флин поднесе оставка во февруари 2017, откако беше откриено дека разговарал за американските санкции кон Русија со рускиот амбасадор во Вашингтон, уште пред доаѓањето на Трамп на функцијата, и го излажал потпретседателот Мајк Пенс за содржината на тој разговор.
