И покрај дождот, силниот ветер и бурата над Рајнската област, илјадници луѓе во градовите - карневалски упоришта излегоа на улиците за да го прослават почетокот на „петтото годишно време“.
Реклама
Добро расположени Германци, хектолитри пиво, карневалски песни, танц и славење на секој чекор. Вчера сите го славеа почетокот на кулминацискиот период на карневалот. Согласно традицијата во 11 часот и 11 минути беше означен почетокот на петдневните прослави. Бројните карневалисти не ги поколеба не само орканот Томас кој во текот на целиот вчерашен ден беснееше над Германија, туку и заострените мерки за безбедност поради стравот од терористички напади. Така, на пример, во Келн на камиони им е забранет влез во центарот на градот, а поставени се и бетонски ѕидови на клучни улици. На улиците вчера имаше 2.200 тешко вооружени полицајци. Карневалот вчера го проследи и бурата со име Томас, поради која беа откажани прославите на отворено во некои места во Рајнската област. Инаку, вчера жените ја презедоа власта во карневалските упоришта, од кои Келн е најголемото - со традиционалното сечење на вратоврските на мажите.
Во понеделник карневалот доживува кулминација на т.н Розенмонтаг, кога низ градовите минува централната карневалска поворка со многу возила од кои маскирани паринцови, принцези, црвени и сини офицери ќе фрлаат т.н. камеле, односно слатки. На крајот карневалистите се враќаат дома со полни торби со „камеле“.
Започна „петтото годишно време“
00:59
Германските карневалисти годинава на духовит и сатиричен начин се пресметуваат со популизмот. Овојпат нивна цел е американскиот претседател Доналд Трамп. Тој се прикажува како слон во продавница за порцелан, наместо нос има сурла - со тоа се алудира на штетата која ја предизвикува со своите изјави и одлуки. Трамп на карневалската поворка во Келн ќе биде прикажан и со кесето кое германските првачиња го носат на првиот училишен ден, но во неа нема слатки, туку кодови за активирање на нуклеарни бомби. На мета на карневалистите се и претседателите на Русија и на Турција, Владимир Путин и Реџеп Таип Ердоган и секако канцеларката Ангела Меркел, која како бубамара лежи на грб и не може да се врати на нозе додека нејзиниот противкандидат за канцелар Мартин Шулц од Социјалдемократската партија бележи сѐ поголема популарност кај избирачите.
10 причини да се вљубите во Келн
Уметност, култура и карневал.. Но, Келн има многу повеќе: старите зградите во градот раскажуваат за двеилјадигодишната историја, а тука се и бројните саеми, музеи и извонредниот ноќен живот.
Фотографија: Dieter Jacobi/KölnTourismus GmbH
Катедралата во Келн – буквално огромен споменик
Околу 20.000 луѓе дневно ја посетуваат катедралата во Келн, поради што таа се вбројува во најпопуларните туристички дестинации во Германија. Катедралата во Келн е изградена пред повеќе од 700 години, а беа потребни речиси исто толку години истата да биде изградена. Готското архитектонско дело се наоѓа на листата на светското наследство на УНЕСКО од 1996 година.
Фотографија: Udo Haake/KölnTourismus GmbH
Стариот градски центар – модерно историско место
Стариот градски центар за време на Втората светска војна беше речиси целосно уништен. Голем дел од предните фасади, на веќе постоечките куќи од 1960-те години, беа реконструирани во историски стил, како што е прикажано на сликата погоре, снимена на познатиот Фишмаркт во Келн. Во тесните улички на стариот градски центар може да се најде голем избор на таверни, ресторани и пивници.
Фотографија: Jens Korte/KölnTourismus GmbH
Дом на традиционалното келнско пиво
Луѓето во Келн најмногу уживаат во локалното пиво „Kölsch“. Ова пиво смее да се произведува само во Келн и блиската околина. Се сервира во „Kölschstange“ – висока и тенка чаша од 200 мл. Се конзумира најдобро во придружба со некој од локалните специјалитети како што се „Himmel und Äad“, што на локалниот диjалект значи рај и земја – ова јадење се состои од пире, каша од јаболко и крвав колбас.
Фотографија: Privatbrauerei Gaffel
Музеи – од антички до модерни времиња
Во Келн, љубителите на уметноста и културата се соочуваат со проблеми при изборот на галерија или музеј за посета - бидејќи во градот ги има безброј. Музејот Лудвиг, на пример, има изложби на модерна уметност, на поп арт и експресионистички дела. Во Келн секој ќе го најде „својот“ музеј бидејќи има сѐ - од времето на антички Рим до модерна технологија и чоколада.
Фотографија: picture-alliance/dpa/O. Berg
Цркви – сведоштва за поранешната слава
Во средниот век, Келн бил најголемиот град во светот каде се зборува германски, а бил и важен христијански центар. И денес, многу од светите градби во градот, вклучително и 12 романескни цркви, се сведоци за историската религиска важност на Келн. Св. Марија во Капитол е најголемата од нив, а е изградена на локацијата на антички римски храм. Денешната црква е изградена во 11 век.
Фотографија: Jens Korte/KölnTourismus GmbH
Паркот на Рајна – огромно игралиште
Спроти катедралата во Келн, на брегот на Рајна, се наоѓа 40-хектарскиот Рајнпарк. Изграден е во 1912 година, а во 2007 година беше прогласен за најдобар парк во Германија. Огромните тревни површини во лето служат како игралишта за фудбал, а штом зајде сонцето се користат и за ноќни дружења со скара. Со жичарницата над реката Рајна, може да се стигне од паркот до Зоолошката градина во Келн.
Фотографија: picture-alliance/dpa/O. Berg
Карневал – петтото годишно време во Келн
Келнскиот карневал е еден од најголемите и најдобро познати улични карневали во светот. За време на карневалот треба да ги знаете овие важни зборови: „Алаф“ – поздрав кој се користи на карневалот и може да биде извикан во секое време; „Камеле“ се нарекуваат карамелите и бонбоните кои се фрлаат за време на уличните паради и „Бицје“ - мал бакнеж кој слободно се подарува, некогаш дури и на непознати.
Фотографија: picture-alliance/dpa/F. Gambarini
Саем – од Гејмском до Арт Келн
Келн е ширум светот познат како град на саеми. На Гејмском, годишниот саем за компјутери и видео игри, компании од цел свет ги презентираат своите најнови хардверски и софтверски производи. На саемот АртКелн, кој инаку е најстар саем за уметност во светот, може да се најде парче уметност за сечиј џеб. Фотокина, еден од најважните саеми за фотографија во светот, во Келн се одржува секои две години.
Фотографија: Koelnmesse GmbH
Град со „отворен ум“
Келн е и град на толерантноста - затоа и не е изненадување што градот е „упориште“ на хомосексуалците. Еднаш годишно тука се одржува КолонПрајд, двонеделна манифестација за поддршка на правата на геј и трансродовата заедница, која исто така е и најголемата во Европа. Врвот на забавата на геј сцената е тридневната „Кристофер Стрит Деј“ парада која се одржува во првиот викенд во месецот јули.
Фотографија: picture alliance/R. Goldmann
Рајна – трговска и рекреативна рута
Еден од „бонусите“ на Келн е и неговата локација покрај Рајна - најдолгата река во Германија. И самите Римјани биле свесни колку е прикладна оваа локација кога на територијата на денешен Келн, во 19 година п.н.е ја основале првата населба. Денес, жителите и посетителите на Келн, можат да направат мала екскурзија со брод или да изнајмат кану и да добијат уникатен поглед на градската архитектура.