Трендот на појава на нови соеви на коронавирусот нема да запре, оценува министерот за здравство Венко Филипче. Тој денеска информира дека има зголемување на бројот на новодијагностицирани пациенти, но во овој момент, според него, нема притисок ниту во болниците ниту во амбулантите.

„Околу 15 пациенти се лекуваат на Инфективната клиника. Будно ја следиме состојбата. И покрај тоа што сега е прилично мирно, можно е овој тренд на пораст да продолжи и понатаму, а ние интензивно ги следиме и анализираме препораките во однос на вакцинацијата“, вели Филипче.

Министерот изјави дека во овој момент не може да претпостави дали вакцината против Ковид-19 ќе биде сезонска, или ќе се дава и трета доза. Процесот на вакцинација продолжува и доколку се задржи сегашното темпо, до крајот на август треба да бидат вакцинирани 40% од населението, наведува министерот за здравство.

Повеќе:

Ковид-19 повторно зема залет – расте бројот на заразени, а има и починати

Филипче: Од 330 илјади вакцинирани, од ковид се заразиле 92 лица

Во државата досега се вкупно аплицирани 904.583 дози вакцини, а ревакцинирани се 390.562 граѓани, соопшти Министерството за здравство.

Со последните бројки. 63% од населението над 70 години имаат примено барем една доза вакцина, а најмалку една доза од вакцината добиле и 61% од населението над 65 години, 55% од населението над 60 години и 45% од населението над 50 години.