Владата во Каракас ги прекина поморските и воздушните врски со блиските холандски карипски острови. Еден од нив - Курасао, беше најавуван како појдовна точка за испораките на помош во Венецуела.
Помеѓу Венецуела и островите Холандски Антили - Аруба, Бонаир и Курасао повеќе не смеат да сообраќаат авиони и бродови, соопштија венецуелските власти. Вршител на должноста претседател на Венецуела Николас Мадуро досега не го коментираше затворањето на морската граница.
Островот Курасао, кој се наоѓа на само 80 километри од Венецуела, во последните денови беше споменуван како можен центар за помош за испораките на странска помош за Венецуела.
Карипскиот остров е самостојна земја во рамките на Кралството Холандија. Досега, според проценките на организациите за човекови права, околу 15.000 Венецуелци пребегале на Курасао.
Фотографија: Reuters/E. Garrido
Меѓународната хуманитарна помош сé повеќе станува алатка во борбата за власт помеѓу самопрогласениот привремен претседател на Венецуела Хуан Гуаидо и Николас Мадуро. Гуаидо ја повика владата на Мадуро до сабота да дозволи влегување во земјата на хуманитарната помош која главно е испорачана од САД.
Мадуро категорично одбива. Тој во помошта гледа само плашт под кој треба да се подготви американска воена интервенција во Венецуела. Поради таа причина, венецуелската армија во моментов не им дозволува влез во земјата на неколку камиони со хуманитарна помош кои чекаат на границата во соседна Колумбија.
Кој е кој во кризата во Венецуела
Ситуацијата во јужноамериканската држава зоврива. Кои се клучните политички играчи и институции во кризата која се заканува да ескалира во граѓански судир? Повеќе во следнава галерија.
Фотографија: Getty Images/AFP/F. Parra
Хуан Гуаидо
35-годишниот политичар беше релативно непознат сѐ до преземањето на функцијата претседател на националното собранието, во кое мнозинство има опозицијата. Тој сега се самопрогласи за преоден претседател и го осуди владеењето на Мадуро како „нелегитимно". Гуаидо стаса до врвот на поделената опозиција откако клучните личности беа затворени, ставени во куќен притвор или ја напуштија земјата
Фотографија: Reuters/C. Garcia Rawlins
Николас Мадуро
Социјалистичкиот претседател владее со земјата откако во 2013 година извојува тесна победа на спорните избори по смртта на неговиот политички ментор Хуго Чавез. Мадуро ја консолидираше контролата врз клучните државни институции, вклучително и Врховниот суд, војската и државната нафтена компанија. Но економијата колабираше, граѓаните западнаа во сиромаштија, а милиони ја напуштија земјата.
Фотографија: picture-alliance/dpa/A. Cubillos
Армијата на Венецуела
Првите луѓе на војската на Венецуела досега го поддржуваа Мадуро и покрај повиците на опозицијата војската да застане на страната на народот. Деновиве имаше мал бунт, а Гуаидо вети амнестија за војниците кои помогнале да се собори Мадуро. Тој, пак, работеше напорно за да ја придобие војската на своја страна, поставувајќи воени офицери на клучни владини позиции и во државната нафтена компанија.
Фотографија: picture-alliance/AP/R. Mazalan
Национално контра конститутивно собрание
Националното собрание во 2017 година е суспендирано од Врховниот суд под контрола на Мадуро и заменето со провладино конститутивно собрание чија цел е да го преработи уставот. Опозицијата ги бојкотираше изборите за конститутивното собрание во јули 2017 година, тврдејќи дека со ова илегално се узурпира моќта на законодавниот дом.
Фотографија: Getty Images/AFP/F. Parra
Граѓаните на Венецуела
Политичкиот раскол и острите поделби на два табора речиси како во огледало се отсликуваат и меѓу луѓето во Венецуела. Тензиите растат како во Каракс, така и во другите градови во земјата со оглед дека и приврзаниците и противниците на Мадуро излегуваат на улиците. Според наводите на невладините организации, во насилствата во земјата секојдневно има загинати и повредени.
