Целта на резолуцијата, според извори во партијата, е да се побара општествен консезус и да се исцртаат позициите кои ќе се бранат во преговорите со источниот сосед, од кои и оваа и секоја идна влада не треба да се повлече, бидејќи истото би предизвикало нарушување на државните интереси.

Според партијата, дефинициите кои ќе се употребат во резолуцијата се истите оние кои се употребени од МАНУ и од УКИМ како најреномирани научни институции, што ќе говори и за намерата да се вклучат сите напредни елементи кои треба да предводат во заштитата на државните интереси.

Од ВМРО-ДПМНЕ велат дека бугарските ставови се прецизно дефинирани во бугарската декларација и во она што сихронизирано го говорат бугарски политичари, а проблемот е што македонските позиции се нејасни и свесно се дозволува тие да бидат флексибилни и на штета на идентитетските обележја.

Повеќе:

-Што точно сака Бугарија од С. Македонија?

-Ревизија на македонскиот идентитет

-Бугарските интелектуалци со осуда на декларацијата на Софија: Поттикнувате омраза

Одговорна држава би постигнала општествен и национален консезус за вака важни прашања, порачуваат од партијата.

За деталите и текстот на резолуцијата денеска се очекува посебна прес-конференција да има лидерот на ВМРО-ДПМНЕ, Христијан Мицкоски.

Овој предлог доаѓа по изјавата на португалската секретарка за европски прашања, Ана Паула Закаријаш, која македонскиот јазик го нарече северномакедонски и изјави дека тој некогаш бил дел од бугарскиот, но и по засилената негаторска реторика од источниот сосед.