Во парламентот се очекува одлука дали денеска ќе се гласа за уставните измени, или процедурата ќе се одложи за почетокот на следната недела. Од Белград се јави и заменикот-помошник за Европа на САД, Метју Палмер
Фотографија: MAKFAX
Реклама
Уставните измени во Собранието го очекуваат потребното мнозинство од две третини. Неизвесно е дали е тоа обезбедено, иако има сигнали дека расте поддршката за отворање на уставната процедура и од страна на пратениците на ВМРО-ДПМНЕ. Во јавноста се множат шпекулации, кои засега не можат да бидат потврдени од ниту една страна. Според зборовите на пратеникот на владејачката коалиција, Ферид Мухиќ „ако се гласа значи е обезбедено двотретинско мнозинство, ако не се гласа значи не е, рокот е некаде до среда, но мислам дека денес ќе успее.“
Расте притисокот и од претставниците на САД и ЕУ. Откако утрово и синоќа за компромис апелираа еврокомесарот Јоханес Хан и претседателот на Европската народна партија, Жозеф Дол, денеска од Белград се јави и заменикот-помошник за европски и евроазиски прашања во американскиот Стејт Департмент, Метју Палмер. Тој директно побара од раководството на ВМРО-ДПМНЕ „да ги ослободи пратениците да можат да гласаат според совеста, без грижи дека ќе имаат негативни последици потоа“.
Палмер посредно ја обвини најголемата опозициска партија дека ги замајува граѓаните.
„Оние кои ја заведуваат македонската јавност говорејќи дека можат да обезбедат европска иднина за своите деца без компромисите кои ги бара Преспанскиот договор, не ѝ прават услуга на својата земја“, рече Палмер во Белград каде присуствува на Белградскиот безбедносен форум. Од понеделник, американскиот дипломат се очекува и во Скопје на разговори со македонскиот државен врв.
Еврокомесарот за проширување Јоханес Хан преку својот Твитер профил порача дека денешниот е „клучен“ ден за земјата.
„Се гласа за иднината на земјата и за позитивната перспектива на граѓаните“, напиша Хан додавајќи дека е сигурен дека „пратениците на сите политички партии се свесни за големата шанса и одговорност со која се соочуваат“.
Во сличен тон и првиот човек на Европската народна партија (ЕПП), Жозеф Дол по вторпат во една недела ѝ порача на опозицијата дека „има голема одговорност за патот на земјата кон ЕУ и НАТО и дека треба да биде конструктивна во демократскиот процес“.
Пост-референдумски вокс-поп: зошто (не) гласав за промена на името
Нашата фоторепортерка Каролин Вајнкопф мина неколку недели во Македонија, пред и по референдумот. Со својот објектив, но и низ разговор со граѓаните се обиде да ја сондира атмосферата во државата. Еве што забележа
Фотографија: DW/B. Georgievski
Мојот идентитет не зависи од името на државата
Оли има 40 години и е сопственик на кафе бар во Скопје, организира техно забави и е јога инструктор. Оли гласал „За“ и смета дека тоа било негова граѓанска должност. Тоа што многу негови сограѓани го бојкотираа гласањето или едноставно не им било грижа, го прави тажен, но го очекувал. Оли вели дека не му е грижа за името на државата. Неговиот идентитет не зависи од тоа.
Фотографија: DW/Carolin Weinkopf
Не се откажувам од мојот идентитет и достоинство
Филип има 29 години и работи како ИТ инженер во Скопје. Свесно го бојкотирал референдумот. Филип сака неговата земја да биде во ЕУ и НАТО, но одлучил да не гласа како протест против владата.„Името е дел од мојот идентитет и моето достоинство. Не сакам да се откажам од тоа“, вели Филип. На прашањето: зошто тогаш не гласал против, Филип вели дека немало кампања за „против“.
Фотографија: DW/Carolin Weinkopf
„Против“ како протест против Владата
Тони има 37 години, роден е во Скопје и работи како консултант. Тој е меѓу ретките кои гласале „против“. Тони смета дека бојкотот е глупав и неодговорен. Тој чувствувал обврска да гласа, а со неговиот глас „против“ сакал да и порача на владата дека е разочаран од неа. Како на етнички Албанец не му пречи промената на името, но се чувствува како Македонец и силно се идентификува со својата земја.
Фотографија: DW/Carolin Weinkopf
Не се осмелија ни да споменат „Северна Македонија“
Златко има 37 години и по професија е епидемиолог. Тој го бојкотирал референдумот. Зошто? „Затоа што тоа е спротивно на сѐ во што верувам. Гласањето ќе му дадеше значење на прашањето, кое воопшто не е ни за дискусија“. Според него, владата се обидела да ги измами граѓаните. „Немаа храброст ни да напишат Република Северна Македонија на ливчето. Затоа што не се осмелија да го кажат тоа гласно“.
Фотографија: DW/Carolin Weinkopf
Подобра иднина за децата
Со Хиснија (60), неговата сопруга Фериде (55) и нивната ќерка Зумра (31) разговаравме на полињата со тутун во прилепско. Тие гласале „За“ затоа што се надеваат на подобра иднина во ЕУ. Сакале на децата да им обезбедат подобра иднина. А влезот во ЕУ и НАТО според нив значи подобра иднина. Тажни се дека референдумот не успеал. Имале големи надежи во него и сега не знаат што да очекуваат.
Фотографија: DW/Carolin Weinkopf
Какво достоинство ни остана?
Дарјан има 36 години и работи во дигитален маркетинг во Скопје. Гласал „За“ но чувствува внатрешен судир во врска со одлуката. Смета дека многумина бојкотирале, но потајно се надеваат дека парламентот ќе го изгласа договорот. Тоа е начин на протест. „Никој не сака да го смени името... се работи за достоинството! Но Македонија е толку падната ниско во моментов... какво достоинство ни остана?“
Фотографија: DW/Carolin Weinkopf
„Чудна кампања“
Рипа има 27 години, а во Македонија се доселила од Ерменија пред 5 години. Работи како шеф на маркетинг во познат ланец хотели. Во меѓувреме добила и државјанство, а на референдумот гласала „За“. Таа мисли дека кампањата била „чудна“- прашањето било поставено како Македонија утре да ќе влезе во ЕУ, а самата промена на името не била правилно наведена.
