Во светот не се откриени ни 10 отсто од случаите на Ковид-19
БГ
13 април 2020
Истражувачи од германски универзитет тврдат дека државите досега, во просек, откриле само 6 проценти од заразените со коронавирус. Вистинската бројка веројатно е десетици милиони.
Фотографија: Reuters/A. Wang
Реклама
Вкупниот број на инфекции со коронавирусот веројатно е драстично повисока одошто тоа го откриваат официјалните податоци на здравствените власти ширум светот, се наведува во нова студија (целата студија на англиски јазик).
Кристијан Бомер и Себастијан Фолмер од Универзитетот во Гетинген ги анализирале податоци објавени неодамна од Лансет журналот за инфективни болести. Истражувачите ги анализирале проценките за смртноста од коронавирусот и периодот од инфекцијата до смртта за да го проценат квалитетот на официјалните податоци.
Според нив, податоците покажале дека државите откриле, во просек, само околу 6% од сите инфекции со коронавирус. Тие тврдат дека вистинскиот вкупен број на заразени луѓе веројатно веќе достигнал десетици милиони луѓе во светот.
„Овие резултати значат дека владите и носителите на политички одлуки треба многу да внимаваат кога ги интерпретираат бројките заради правење планови“, вели Фолмер, професор за развојна економија на Универзитетот.
„Таквите екстремни разлики во бројот и квалитетот на тестовите спроведени во различни земји значат дека официјалните податоци се во најголем дел неинформативни и не обезбедуваат корисни информации“.
Малку откриени- висока стапка на смртност
Бомер и Фолмер проценуваат дека на 31 март 2020 година, Германија веројатно веќе имала над 460 илјади заразени. Врз основа на истиот метод, тие пресметуваат дека во САД имало повеќе од 10 милиони, во Шпанија над 5 милиони, во Италија околу 3 милиони и во Велика Британија околу 2 милиони заразени со коронавирус. На тој ден, Џонс Хопкинс универзитетот пресмета дека во светот имало 900 илјади луѓе позитивни на вирусот.
„Иако според податоците на Џонс Хопкинс во светот на овој датум има помалку од еден милиони заразени, ние проценуваме дека бројката е неколку десетици милиони“, се наведува во студијата.
- актуелни податоци на Џонс Хопкинс Универзитетот
Според авторите, неадекватното и одложено тестирање може да е причината што некои европски земји, како Италија и Шпанија, пријавуваат далеку повисока стапка на смртност одошто Германија.
Нивната проценка вели дека во Германија досега се идентификувани околу 15,5% од заразените, наспроти 3,5% во Италија и 1,7% во Шпанија. Процентот на откриени случаи е најнизок во САД (1,6%) и во Велика Британија (1,2%), велат германските истражувачи. Наспроти овие земји, се проценува дека Јужна Кореја открила повеќе од половината случаи на заразени со Ковид-19.
Двајцата автори сметаат дека се потребни големи подобрувања во способноста на земјите да откриваат нови инфекции и потоа да усвојат мерки за изолација на заразените и откривање на нивните контакти.
Доколку не успеат во тоа, „вирусот може повторно да остане неоткриен на подолг временски период и прашање на време е кога ќе се случи нова епидемија“, предупредуваат двајцата професори.
Каде сѐ демне коронавирусот?
Коронавирус насекаде! Можеби дури и на пиперките, билетот за возење, сопственото домашно милениче. Што воопшто смеам да допирам? Ова вознемирувачко прашање си го поставуваат многумина. Еве неколку смирувачки одговори:
Досега познатите коронавируси остануваат опасни на површини како кваките околу четири-пет денови. Како и другите инфекции преку капки и SARS-CoV-2 се пренесува преку рацете и површините кои се допираат често во текот на денот. Иако вирусот е нов и затоа е прилично непознат, експертите сметаат дека и за него важат многу резултати од истражувања на други, веќе познати коронавируси.
Затоа, треба да се биде претпазлив и кога се руча во кантината на работното место - доколку таа одамна не е веќе затворена. Коронавирусите во основа можат преку кивање или кашлање на инфицирано лице да завршат на приборот за јадење или чиниите. Германскиот институт за проценка на ризици (БфР) меѓутоа пишува дека „досега не се познати инфекции со SARS-CoV-2 кои се појавиле со ваков начин на пренос“
Фотографија: picture-alliance/dpa/J. Kalaene
Страв од увозна стока?
Дали родителите мора да се плашат од инфекција преку играчки од увоз? Не, велат од БфР. Досега нема случаи на инфицирани лица за кои е докажано дека се заразиле преку увезени играчки или друга стока. Експертите сметаат дека вирусите немаат голема стабилност при промена на животната средина. Предизвикувачот на болеста е опасен повеќе денови пред сѐ во услови на студ и голема влажност на воздухот.
Фотографија: picture-alliance/dpa/S. Gollnow
Пакети полни вируси
Коронавирусите кои го напаѓаат човекот не се особено стабилни на суви површини. Со оглед на тоа што стабилноста на вирусите надвор од човечкиот организам зависи од могу фактори, како темпертурата и влажноста на воздухот, БфР ја смета инфекцијата по пошта за „главно неверојатна“. Сепак, институтот признава дека сѐ уште не располага со точни податоци за SARS-CoV-2.
Фотографија: picture-alliance/dpa/M. Becker
Вирусен пинг-понг со домашното милениче?
Дали моето куче може да ме зарази мене или јас да го заразам него? Ризикот домашните миленичиња да се заразат од коронавирус е оценет како низок од страна на експертите. Но, тој не може сосема да се исклучи. Самите животни не покажуваат симптоми, значи не заболуваат. Но, доколку се инфицирани тие може преку својот здив, плунка, повраќање, урина да го пренесуваат вирусот.
Фотографија: picture-alliance/dpa/AP/A. Tarantino
Опасен зеленчук?
Пренесување на SARS-CoV-2 преку контаминирани прехранбени продукти, според БфР, не е веројатно. Досега нема докажани случаи на инфицирање на ваков начин. Темелно миење на рацете пред подготовка на оброкот, и во времиња пред и по коронавирусот, е нешто што се подразбира. Со оглед на тоа што вирусите се чувствителни на топлина, загревањето на намирниците натамошно го намалува ризикот од инфекција.
Досега познатите САРС и МЕРС коронавируси не сакаат топлина, но се прилично отпорни на студ. Тие може да останат опасни дури две години на температури од минус 20 степени Целзиусови. БфР меѓутоа смирува: досега нема укажувања за ланец на инфекции со SARS-CoV-2 преку конзумирање храна, вклучително и замрзнати продукти.
Избувнувањето на КОВИД-19 има и едно добро: Кина забрани храна од диви животни. Сѐ укажува на тоа дека новиот коронавирус врз човекот е пренесен од лилјаци. Лилјаците за тоа не се виновни, зашто веројатно завршиле во супа против своја волја. Но, борбата против SARS-CoV-2 ќе трае многу подолго и ќе биде потешка од ослободувањето од храна од диви животни.
