Германија (засега) ќе ги признава само западните вакцини
БГ /РТР
12 мај 2021
Германија ги олеснува условите за патување пред почетокот на летните одмори и намалените бројки на новозаразени во земјата. Вакцинирани, оздравени и лица со негативен тест ќе можат слободно да патуваат.
Фотографија: Sergei Supinsky/AFP/Getty Images
Реклама
Германската влада усвои ново упатство за влез во земјата кое овозможува вакцинираните, оздравените и лицата со негативен тест да можат да влегуваат без обврска за карантин. Но правилото ќе важи само за лица кои не доаѓаат од земји со висок ризик (на пример С. Македонија) или земји каде се присутни нови мутации на коронавирусот (на пример Индија). За нив останува обврската веднаш по пристигнувањето да заминат во 10 дневен карантин.
Дополнително, како вакцинирани ќе се признаваат само оние лица кои добиле вакцина одобрена во ЕУ. Во моментов, тоа се вакцините на АстраЗенека, Фајзер, Модерна и Џонсон и Џонсон.
Прошетка во Русија и вакцинирање
02:17
This browser does not support the video element.
За патниците од Северна Македонија која, според Институтот Роберт Кох (РКИ), се уште се води како „високо-ризична“ земја поради високата инциденца на новозаразени, новите мерки нема да донесат големо олеснување на правилата. Дополнително, оние кои се имунизирани со вакцина која се уште не е признаена во ЕУ, нема да можат да се водат како вакцинирани.
Речиси сите балкански држави во моментов се водат како ризични или високо-ризични, со исклучок на Албанија на која од пред неколку дена и е укинат ограничувачкиот статус. Останатите се водат како „ризични“ или високоризични- односно земји со висока инциденца.
За оние кои доаѓаат во Германија од земји со статус „ризични“ повеќе нема карантин, и ќе им биде доволен антиген тест не постар од 48 часа, или ПЦР тест не постар од 72 часа.
И покрај Ковид, шансите за летување се зголемуваат
Бројот на новоинфицирани со коронавирус во Европа се намалува, бројот на вакцинирани се зголемува. Многу земји се надеваат на туристи и почнаа со разлабавување на мерките.
Фотографија: Zhou Nan/Xinhua/picture alliance
Австрија
Гастрономијата, хотелите, спортските настани во Австрија се повторно достапни од 19 мај. Како мерка на заштита е предвидено приложување негативен корона-тест. Дозволени се и манифестации кои се одржуваат надвор (до 3000 лица) и внатре (до 1500 лица). Со разлабавувањето на мерките би требало да отпадне и карантинот. Вакцинираните, тестираните и оздравените од Ковид ќе смеат да влезат во земјата.
Оној кој патува во Швајцарија мора да има негативен корона-тест. Тоа не важи за оние кои патуваат транзит. Во карантин мора да одат оние што доаѓаат од ризични подрачја. Отворени се хотелите, музеите, продавниците, театрите, кината.. На терасите од рестораните е дозволена храна и пијалоци. Насекаде има лимит за бројот на посетители, правила за дистанца и носење маска, но не и полициски час.
Гастрономите во Грција работат, но мора да затворат во 22:45 часот, зашто од 23 часот стапува во сила полицискиот час. Туристите кои одат во Грција мора пред влез во земјата да ги внесат своите податоци онлајн. При влез во земјата мора да се покаже дека лицето е целосно вакцинирано, или да се приложи негативен ПЦР-тест. Обврска за карантин веќе нема.
Фотографија: Chun Ju Wu/Zoonar/picture alliance
Италија
Италија постепено ги разлабавува своите корона-рестрикции. Онаму каде бројките се умерени, рестораните смеат да сервираат храна во отворениот дел. Од 22 часот стапува на сила полициски час. Музеите и кината во т.н. жолти зони се отворени. Во Италија на 2 јуни официјално почнува летната сезона. Како ќе изгледаат правилата тогаш, сѐ уште не е јасно.
Фотографија: Maria Laura Antonelli/Avalon/Photoshot/picture alliance
Франција
И Франција ги разлабавува рестрикциите полека. Луѓето повторно смеат да се движат и подалеку од 10 километри од својот дом, а повторно се можни и патувања во границите на земјата. Во сила е полициски час од 19 часот, кој од 19. мај треба да почнува од 21 часот. Тогаш треба повторно да отворат и рестораните (само отворените делови), како и продавниците и културните институции.
Фотографија: ROBIN UTRECHT/picture alliance
Шпанија
Ситуацијата во Шпанија е значително порелаксирана, многу од мерките се разлабавени, но сепак - повеќе региони сакаат да го задржат ограничувањето на движењето. И натаму важи и обврската за носење маска на отворено. Влез на лица од сите земји од ЕУ и од Шенгенската зона е во основа можен. Обврската за тестирање за оние кои доаѓаат од ризични региони, меѓутоа, и натаму важи.
Фотографија: Jordi Boixareu/Zuma/picture alliance
Португалија
Вонредната состојба, која траеше околу пет и пол месеци, на 1. мај веќе не беше продолжена. Оттогаш, рестораните, културните институции и местата за забава смеат да бидат отворени до 22:30 часот. Досега на викендите работа беше дозволена само до 13 часот. Освен тоа, отворена е и границата со Шпанија. Но, и натаму не е дозволен влез за лица од земји каде 14-дневната инциденција е повисока од 150.
Фотографија: Hilda Weges/Zoonar/picture alliance
Данска
Продавниците работат, а така е и со рестораните, но да влезат смеат само гости кои се најавиле преку апликација и приложиле негативен тест, доказ за целосна вакцинација или доказ за прележан Ковид. Целосно вакцинираните лица од ЕУ и Шенген зоната смеат да влезат во земјата без посебна причина, но услов е да доаѓаат од земја која е барем во портокалова зона, значи каде ситуацијата не е многу лоша.
Фотографија: Bruno Coelho/Zoonar/picture alliance
Хрватска
Во Хрватска хотелите се отворени, а рестораните смеат да примаат гости во отворениот дел. Во затворен простор на јавни места мора да се носи маска онаму каде што не може да се одржува пропишано растојание. За влез во земјата се бара негативен ПЦР-тест или тест за антитела, потврда за прележан Ковид или доказ за целосна вакцинација.
Фотографија: Pablo Camacho/PhotoAlto/picture alliance
Полска
Полска дава дозвола за прием на гости во хотелите, но само доколку се пополнат максимално 50% од капацитетот. Од 15. мај ќе биде можно да се седи во отворените делови на рестораните. Во внатрешниот дел тоа ќе биде можно од 29. мај. При влез во земјата е задолжителен десетдневен карантин, освен за лицата со негативен ПЦР-тест. И целосно вакцинираните и оздравените не мора да одат во карантин.