Германија оди на победа во Истанбул
7 октомври 2011И покрај обезбедениот пласман на Европското првенство во Полска и Украина следната година, на германската репрезентација не и недостасуваат мотиви пред вечерашниот дуел против Турција во Истанбул. Победа во овој и во последниот дуел против Белгија, ќе значи прв стопроцентен успех на Германија во квалификациите со резултат 10 од 10. Капитенот Филип Лам вели дека рекордот е добар мотиватор, но уште поважно е што играчите се свесни дека секој следен натпревар е и борба за обезбедување место во тимот кој ќе отпатува на првенството.
Селекторот Јоаким Лев на последната прес-конференција призна дека се соочува со проблеми со неколку повредени играчи, но најави дека ќе игра на победа. Мирослав Клозе нема да може да настапи и на негово место во стартната постава се очекува Марио Гомез. Ситуацијата е неизвесна и околу Месут Езил. И тој влече незгодна повреда, но сака да игра против селекцијата на неговите предци. Настапот на Езил е всушност и главната приказна околу која се вртат сите наслови во Германија и Турција во пресрет на мечот.
На првиот дуел, во Берлин, кој Германија го доби со 3:0, Езил постигна гол, но не го прославуваше. Притоа тој беше жестоко исвиркан од турските навивачи на стадионот, кои ги имаше околу 40 илјади. За дел од Турците, Езил е предавник поради тоа што одлучи да игра за Германија, и покрај тоа што е роден и израснат во земјата. Тој самиот, пак, пред мечот во Истанбул вели дека не му пречат свирежите и навредите од публиката.
Турција е моментално втора во групата А, и потребна и е победа за да обезбеди учество во баражот за првенството.
Автор: Борис Георгиевски/ афп/дв
Редактор: Симе Недевски