Групата била предводена од потполковникот резервист Јенс Г., пишува магазинот „Шпигел“. Тој ги организирал вежбите на групата. Портпарол на Обвинителството Линебург за магазинот потврдува дека против девет лица на возраст помеѓу 37 и 53 години се води истрага. Тие се осомничени за приклучување кон вооружена група, односно за давање наредби на вооружена група.

Според портпаролот на Обвинителството, постои „првично сомневање дека мотивот за делување би можел да е - непријателство кон странци“, наведува „Шпигел“. На почетокот на септември имаше рација во осум објекти во покраините Долна Саксонија, Северна Рајна-Вестфалија и Берлин. Притоа се заплнети не само оружје и муниција, туку и материјал кој укажува на десноекстремни уверувања на резервистите.

Трага води во Министерството за одбрана

Непосредно потоа, како што се вели во извештајот, иследниците дознале дека Г. наводно бил во тесен контакт со референт во Министерството за одбрана. Воената тајна служба МАД на средината од септември, при рутинска безбедносна проверка на референтот, наишла на индиции кои упатуваат на десноекстремни уверувања на поранешниот војник. На неговиот мобилен телефон службениците на МАД откриле поврзаност со Јенс Г.

Случајот се смета за сериозен, поради тоа што референтот во одделот „Стратегија и ангажман“ имал пристап до чувствителни тајни информации, како на пример за Командата на специјалните сили (КСК) и тајни иследници на МАД. На референтот му е веднаш забранет пристапот до чувствителни информации и до неговиот оддел.

МАД во интерните системи на Министерството за одбрана проверува дали имало протекување на информации преку референтот. Освен тоа, детално се истражува тесниот круг негови колеги, пишува „Шпигел“, повикувајќи се на информации од одбранбениот ресор. Според извештајот, досега нема уапсени лица.