Германија пушти срце: слободен влез и за невенчани партнери
БГ /РТР
7 август 2020
Германија ќе им даде шанса и на невенчаните парнери да се спојат во време на пандемија на коронавирус. Од понеделник ќе бидат олеснети граничните контроли за да им се овозможи на паровите повторно да се сретнат.
Фотографија: Reuters/C. de Luca
Реклама
По повеќемесечна одделеност поради рестриктивните мерки поврзани со коронавирусот, паровите кои не се во брак конечно ќе можат да се сретнат во Германија. Исклучокот ќе биде направен за партнери на Германци од земји кои Германија ги смета за високоризични, а тоа во моментов се речиси сите земји надвор од ЕУ. Паровите ќе мора да приложат некаков доказ дека биле во врска и пред пандемијата, соопшти германското министерство за внатрешни работи.
Границите на ЕУ беа затворени за патници од земји надвор од блокот од март годинава, со исклучок на неопходните работници и лица кои се венчани за ЕУ резиденти.
На социјалните мрежи, одделените парови лобираа да им се дозволи повторно спојување под хаштазите #LoveIsEssential и #LoveIsNotTourism.
Ковид-19: Љубов преку ограда
01:34
This browser does not support the video element.
Неколку држави, Австрија, Норвешка и Данска, се одзваа на повикот и воведоа ткн. „љубовни визи“ со кои им се овозможува на паровите да се спојат.
Во Германија, паровите ќе мора да покажат покана од партнерот кој живее во Германија и да потпишат изјава со која потврдуваат дека се во врска.
Исто така ќе мора да приложат докази, како печати во пасош или авионски билети, дека се среќавале лично во Германија најмалку еднаш или дека живееле заедно во странство.
Европската комисија денеска го повтори повикот до земјите-членки да им овозможат на невенчаните парови да се среќаваат. Согласно ЕУ регулативите таквата можност постои и можат да ја користат сите земји-членки, но само неколку го прават тоа.
Љубов во време на коронавирус
Илјадници двојки низ цел свет склучија брачен сојуз без оглед на загриженоста поради коронавирусот. „Вооружени“ со заштитни маски, двојките ја запечатија љубовта на масовни свадби во Јужна Кореја и Филипини.
Фотографија: Reuters/H. Ran
Љубовта не прекинува
Среќна невеста и среќен зет ја слават својата романтична свадбена масовна церемонија во Гачиеонг, град во северниот дел од Јужна Кореја. Свадбата се одржа на 7 февруари, пред во земјата да бидат откриени масовни случаи на коронавирусот.
Фотографија: picture-alliance/AP/Ahn Young-joon
Бакнежи преку маски
220 двојки во филипинскиот град Баколод на 20 февруари се заколнаа на вечна љубов на масовна венчавка и се бакнаа, но преку маски. „Поинакво е чувството кога се бакнуваш со маска, но бакнежот е дел од церемонијата“, изјави младоженецот Џон Пол за австралиските медиуми.
Фотографија: Reuters/Bacolod City Public Information Office
Ден на вљубените во кризни времиња
Оваа невеста во филипинската престолнина Манила носи заштитна маска и чека да тргне кон олтарот на масовната свадбена церемонија која се одржа на 14 февруари, на Свети Валентин, омилен ден за масовни венчавки во земјата. На Филипини досега се регистрирани неколку случаи на заразени со коронавирус и има еден починат.
Фотографија: Imago Images/Zuma/L.M. David
Ах, љубов....
На масовна свадба во Јужна Кореја, според француската новинска агенција АФП, биле поделени 30.000 заштитни маски за лице на присутните двојки и нивните гости. Венчавката се одржала во Црквата на обединувањето, основана од Сун Мијунг Мун, кого следбениците го слават како месија.
Фотографија: AFP/Jung Yeon-je
Пресни младенци
Во Јужна Кореја беа откажани фестивали, прослави и концерти, зашто се стравуваше дека масовните собири ќе го поттикнат проширувањето на вирусите. Но пред љубовта, сите мерки капитулираа...
Фотографија: Reuters/H. Ran
Избор - дали да се носи маска или не
Заштитните маски беа делени на масовните свадби, но учесниците и гостите имаа право на избор дали ќе ги носат или не - некои се одлучија да не ги стават.