Германската канцеларка Ангела Меркел го повика парламентот на Монголија да ја укине смртната казна. Пред пратениците во главниот град Улан Батор, Меркел изјави дека претседателот Тсакиа Елбегдорј ја презел предводничка улога во Азија, кога во 2010 година објави крај на спроведување на смртната казна. Кон ова треба да се приклучи и парламентот, подвлече Меркел.

Пред Меркел ниту еден германски канцелар не ја посетил Монголија. Земјата има 2,8 милиони жители и се вбројува меѓу десетте најбогати земји со суровини во светот. Економијата е во голем подем. При посетата на Меркел, Германија и Монголија склучија договор за партнерство во областа на суровините. Договорот треба да им овозможи на германските фирми долгорочен пристап до ретките суровини, кои се користат пред се’ во хај-тек индустријата.

Автор: АТ/дв

Редактор: Е.М.Фиданоска