Соочена со кризата со коронавирусот, владата на канцеларката Ангела Меркел планира пакет за спас на економијата во вредност од 822 милијарди евра- најголем во повоената историја.
Седница на германската влада околу кризата со коронавирусотФотографија: Reuters/J. Macdougall
Реклама
За финансирање на вонредните мерки кои предвидуваат од делумна национализација, преку кредитни гаранции до обезбедување на плати на работниците кои се на принуден одмор, германската влада ќе го напушти и концептот на балансиран буџет.
Според предлог-законот за намалување на последиците од кризата вреден 822 милијарди евра кој треба да биде усвоен в понеделник, не само што владата ја напушта догмата за балансиран буџет, туку ќе отиде и чекор понатаму и ќе бара од парламентот зголемување на законскиот лимит за годишно задолжување.
Владата ќе бара да се задолжи 156 милијарди евра во 2020 година, сума која го надминува уставниот лимит од 100 милијарди.
- Од каде сега да се најдат помошници за жетвата?
Откако пандемијата речиси целосно го запре нормалниот живот во земјата, владата очекува 33,5 милијарди евра помал прилив од даноци годинава.
За да се избегне банкрот на компаниите, владата планира да им додели 400 милијарди евра за отпишување на долговите или ќе им понуди рекапитализација која би можела да доведе до делумна национализација.
Туристичките оператори и сервисната индустрија се меѓу првите кандидати за државна помош, затоа што се меѓу најтешко погодени од пандемијата. Туристичкиот концерн ТУИ веќе побара државна помош, додека авиокомпанијата Луфтханза најави дека ги запира најголемиот дел од летовите.
Во 2009 година во германскиот Устав беше воведена ткн. „сопирачка на долгови“, со која се лимитира дефицитот на сојузниот буџет на 0,35 отсто од БДП. Границата смее да биде надмината само во вонредни ситуации, како природни катастрофи или други состојби кои би можеле да влијаат врз државните финансии.
Кои фирми профитираат од коронавирусот
Стравот од коронавирусот тешко ги погодува финансиски пазари. Кога компаниите мора да ги коригираат своите прогнози за добивка и промет надолу, тоа е отров за курсот на акциите. Но, сепак има и такви кои профитираат.
Кога во последната недела од февруари курсот на акциите ширум светот драматично падна, акциите на платформата за видео стриминг успешно се спротиставија на трендот. Аналитичарите сметаат дека т.н. „останете дома“ акции , како оние на „Нетфликс“ можат да им обезбедат богатство на инвеститорите за време на појавата на коронавирусот, бидејќи на сѐ повеќе луѓе им се вели да останат дома.
Фотографија: picture-alliance/AA/M.E. Yildirim
„Откачете“ го фитнес-клубот
Акциите на фитнес старт-апот Пелотон Интерактив, кој произведува велосипеди за вежбање и, исто така, нуди фитнес часови преку интернет, скокнаа бидејќи стравот од коронавирусот може да поттикне многу фитнес ентузијасти да не одат во своите теретани и клубови и да се одлучат за понудите на Пелотон.
Шефот на фармацевската компанија „Модерна“, Стефан Банкелза кусо време стана милијардер откако компанијата испорача експериментална вакцина против коронавирусот за клиничко тестирање кај луѓето, со што се зголеми цената на нејзините акциите. И Лим Ви Чаи од Малезија, мнозински акционер во фирмата за медицински ракавици „Топ Глав“, влезе во клубот на милијардери среде избувнувањето на вирусот.
Останете дома, останете поврзани
Акциите на телеконференцискиот старт-ап „Зум Видео“ пораснаа речиси за 50% од февруари, откако инвеститорите проценија дека сѐ повеќе луѓе поради стравот од коронавирусот ќе работат од дома. Компанијата веќе придодаде повеќе активни корисници годинава - 2,22 милиони - отколку во целата 2019 година.
Фотографија: zoom.us
Празни полици во супермаркетите
Во супермаркетите, како германскиот „Реве“ и францускиот „Карфур“, прехранбените производи „летаат“ од полиците додека купувачите во паника ги зголемуваат домашните залихи. Затоа инвеститорите засилено вложуваат во акциите на компаниите за пакувана храна. И онлајн трговците, како Амазон, исто така, имаат поголема побарувачка, бидејќи купувачите поради страв од вирусот ги избегнуваат продавниците.
Произведувачите на маски за лице, дезинфекциски средства за раце и дезинфекциски марамчиња се сведоци на огромен раст на побарувачката, бидејќи купувачите бараат начини да се заштитат од вирусот кој брзо се шири. Фирмата „3M“, која меѓу останатото произведува и маски за лице, е една оние со најголема добивка.
Фотографија: picture-alliance/NurPhoto/Yichuan Cao
„Во секое време, насекаде“
Германската софтверска компанија „ТимВјуер“ која им овозможува на корисниците да работат од далечина (од дома), е сведок на голема побарувачка на нејзините услуги, особено во Кина, епицентарот на коронавирусот. На Франкфуртската берза цената на акциите на оваа компанија забележа огромен раст во изминатите неколку дена.
