Германската канцеларка Ангела Меркел во нејзината видео-порака вчера, посветена на образовната политика, рече:„Образованието, како да се стигне степенот - до земја на образование, ќе биде доминатна тема во наредните недели.“ Меркел најави дека во декември со покраинските премиери ќе се разговара за тоа како да се постигне целта - до 2015 година да се одвојуваат 7% од брутодомашниот производ за образованието.

Проблемите се бројни

Подготвеноста за протести на студентите ширум светот е голема, затоа што проблемите на универзитетите се универзални, имено - недоволно финансирање и премногу бирократија, оценуваат Арам Гадими, студент од Виена и Кристијан Деринг од иницијативата „Образовен штрајк“ на Универзитетот Марбург:

„Преполни сали за предавања, премалку места за определени семинари, генерален проблем со упис на факултетите, воведување приемни испити и други играничувања“, ги набројува Гадими проблемите во високото образование.

„На универзитетите има се‘ повеќе испити, особено во сферата на природни науки каде има неделни тестови и ако тие не се положат нема да се добие ниту дозвола за да се излезе на испит. Постои принуда да се биде присутен на предавањата, дури и ако си болен. Од семинарите се „лета“ надвор само затоа што нема доволно места за сите заинтересирани. За доцентите е невозможно да организираат семинар со 80 студенти. Едноставно невозможно е да се завршат студии во регуларно предвиденото време.“

Поддршка во општеството за студентските протести

Покраинските министри неодамна ветија дека ќе ги отстранат слабите точки во спроведувањето на Болоњските реформи и од универзитетите побараа пофлескибилно да ги организираат Бечелор-студиите. Но, тоа не ги „омекнува“ студентите. Кристијан Деринг оценува дека е тоа чисто тактички потег и вели дека министрите се изненадени од големата поддршка што ја имаат студентите од страна на општеството во нивниот протест, па се обидуваат да ја смират јавноста со површински корекции.

Автор: Анке Петерман/ Елизабета Милошевска Фидановска

Редактор: Симе Недевски