Германското обвинителство поведе истрага за поплавите
ЖА / агенции
6 август 2021
Против функционер од регионот Арвајлер поведена е истрага под сомнение за убиство од небрежност по катастрофалните поплави со десетици жртви. Дали алармот против невремето стигнал задоцнето?
Фотографија: Hannes P. Albert/imago images
Реклама
Државното обвинителство од Кобленц започна истрага против претседателот на округот Арвајлер, Јирген Фелер поради катастрофалните поплави од пред три недели. Против него постои почетно сомневање за убиство од небрежност и нанесување ненамерни телесни повреди преку изоставање помош, соопшти Обвинителството, а се води истрага и против уште еден член на Кризниот штаб.
Според правилата за пожар и законот за заштита од катастрофи на покраината Рајнланд-Фалц, Фелер сноси одговорност за носење одлука во вакви случаи. Членот на Кризниот штаб, според досегашните сознанија, спровел акција само делумно навремено.
Обвинителството смета дека постоеле укажувања според кои засегнатите жители на Долината на Ар требало да бидат предупредени и пренесени на безбедно најдоцна до 20:30 часот, уште пред почетокот на поплавата. Почетното сомнение укажува дека тоа не се случило со потребната јасност и дошло со задоцнување. Во округот Арвајлер состојба на катастрофа е објавена дури околу 23 часот, поради што од аспект на Обвинителството постои можна одговорност за дел од предизвиканите смртни случаи и повреди кај граѓаните.
Германија: После поплавите доаѓаат политичарите
Поплавите често ја погаѓаат Германија. И тогаш следува познато сценарио: доаѓаат политичарите и ветуваат помош. Потсетуваме на најважните посети на политичари по катастрофи во изминатите децении.
Во поплавите кои го погодија крајбрежното подрачје на Северно море во февруари 1962 загинаа повеќе од 300 луѓе. Десетина илјади жители на Хамбург останаа без кров над глава. Тоа беше пресвртница во кариерата на идниот канцелар Хелмут Шмит, тогаш сенатор за внатрешни работи во Хамбург. Кризниот менаџмент и одлуката да се ангажира армијата во помошта за настраданите го направија познат во Германија.
Фотографија: Blumenberg/dpa/picture alliance
Хелмут Кол, Бранденбург, 1997
„Вечниот канцелар“ беше при крајот на мандатот кога го посети Бранденбург во 1997 година, по катастрофалните поплави во регионот на истокот на Германија до реката Одра. Оваа ткн. „поплава на обединувањето“ се смета за прва национална криза која беше тест на солидарноста меѓу тукушто обединетата Источна и Западна Германија.
Фотографија: picture alliance
Герхард Шредер, Грима, 2002
На Герхард Шредер му се насмевна среќата по големото невреме во Саксонија во летото 2002, кога поплави ги зафатија Германија, Австрија и Чешка. Кандидатот за канцелар на СПД, соочен со не многу успешна предизборна кампања, облече чизми и се претстави како кризен менаџер во поплавеното градче Грима. Еден месец подоцна победи на изборите.
Фотографија: localpic/imago images
Едмунд Штојбер, Пасау, 2002
За Едмунд Штојбер, тогаш кандидат за канцелар на ЦДУ/ЦСУ, посетата на политичкиот противник Герхард Шредер на поплавените подрачја беше како студен туш. Штојбер беше на одмор на северот на Германија кога се случи катастрофата. Во Саксонија стигна неколку дена подоцна и огорчено се жалеше на „поплава-туризмот“ на својот ривал.
Фотографија: Armin_Weigel/dpa/picture-alliance
Ангела Меркел, Ној Гарге, 2006
Ангела Меркел неколку пати во текот на својот мандат посетуваше настрадани подрачја, а првпат во март и април 2006 во долината на реката Лаба во Саксонија. Катастрофата се случи само неколку месеци по ураганот Катрина во САД, кога Џорџ Буш беше критикуван поради лошиот кризен менаџмент. Меркел се погрижи тоа да не и се случи и на неа.
Фотографија: Patrick Lux/dpa/picture alliance
Ангела Меркел, Дрезден, 2013
Источна и јужна Германија ја погодија екстремни поплави во летото 2013, неколку месеци пред изборите. Катастрофата се закануваше да го уништи историскиот центар на Дрезден откако се излеа реката Лаба. Поплавите тогаш погодија поголем дел од средна Европа. Меркел ги посети погодените региони во Саксонија и Баварија и вети помош.
Фотографија: Arno Burgi/dpa/picture alliance
Армин Лашет, Хаген, 2021
Кандидатот за канцелар на ЦДУ/ЦСУ ги откажа сите планирани состаноци и замина во поплавениот Хаген. Овојпат политичкиот влог е голем, со оглед дека разорните поплави ги погодија гласачите во неговата матична Северна Рајна Вестфалија. Главен ривал на Лашет е партијата на Зелените, а неговата репутација на заштитник на индустријата на јаглен би можела да и наштети на неговата кампања.
Фотографија: Ina Fasbender/AFP
Олаф Шолц, Арвајлер, 2021
Кандидатот за канцелар на СПД, Олаф Шолц ги посети тешко погодените места заедно со премиерката на Рајнланд Фалц и партиска колешка Малу Драјер. Иако според анкетите неговата партија заостанува зад ЦДУ, како актуелен министер за финансии, Шолц вети итна државна помош за погодените региони.
Канцеларката Ангела Меркел во неделата (18.07.2021) го посети селото Шулд во Ајфел. Го увери локалното население дека ќе им даде поддршка и веднаш најави нова посета. „Ќе останеме во контакт и ќе се вратам кон крајот на август“. Дали е тоа ветување во рамките на предизборната кампања? Не- Меркел не се кандидираше на парламентарните избори закажани за септември 2021.
Истражните дејства започнале уште во средата, сега се запленети меѓу другото и документите и податоците на Кризниот штаб на округот Арвајлер, како и мобилните телефони на двајцата осомничени. Обвинителството и Покраинската служба за борба против криминал укажуваат на фактот дека за истрагата ќе биде потребно време, молејќи го населението за доставување дополнителни докази.
Екстремните обилни врнежи од дожд пред три недели предизвикаа катастрофални поплави на реките во покраините Северна Рајна Вестфалија и Рајнланд-Фалц, многу области, посебно по течението на реката Ар се опустошени. Само во покраината Рајнланд-Фалц загина 141 човек, 16 сеуште се водат за исчезнати. Досега се регистрирани 766 повредени лица.
Тегобен поглед од небо на настраданите подрачја од поплавите во Германија