Германско државјанство добиле намален број Македонци
ЖА / дпа
4 јуни 2020
Во 2019 година германски државјани станале помалку Македонци отколку во претходните две години, додека расте бројот на Британци кои се стекнале со германски пасош.
Фотографија: picture-alliance/K. Willig
Реклама
Лани 850 граѓани од Северна Македонија добиле германско државјанство, што е помалку во однос на 2018 година, кога биле 940 и во 2017 година - 988, но е за преку 100 повеќе од бројот на натурализирани Германци со македонско потекло во 2015 година - 732.
Бројот на граѓани кои се стекнале со германско државјанство во 2019 година бележи пораст од 15 проценти, а натпросечен е на оние по потекло од Велика Британија. Ова произлегува од новиот извештај кој го објави вчера Германската служба за статистика. Според него, германски пасош добиле 128.900 странци, највисоко ниво по 2003 година. Делумно, ова е последица на Брегзит: кратко пред Велика Британија да ја напушти ЕУ, преку 14.600 Британци примиле германско државјанство, што е повеќе отколку во двете претходни години заедно – 2018 (6.600) и 2017 (7.500). Бројот на Британци кои бараат германски пасош по 2016 година расте, само за споредба, во 2015 година германско државјанство стекнале само 600 британски граѓани.
Во речиси сите случаи, Британците решиле да го задржат и своето британско државјанство. Британците кои зеле германски пасош во 2019 година релативно долго живееле во Германија, половината од нив – преку 26 години.
Инаку, најбројна група која лани примила германско државјанство се Турците (16.200), па Британците, Полјаци (6.000), Романци (5.800) и Ирачани (4.600).
Бројот на луѓе со миграциско потекло во Германија за 2019 не е објавен. Во 2018 година околу 20,8 милиони граѓани биле со странско потекло, што значи отприлика секој четврт во Германија или самиот тој или некој од неговите родители не бил роден во Германија. 48 проценти од овие луѓе биле странци, а 52 проценти – Германци.
Девет нешта во Германија кои на странците им се чудни
Она што на Германците им е целосно нормално, на некои странци им претставува културен шок. Претставуваме неколку типични примери на однесување и навики, кои во други земји не се баш вообичаени.
Фотографија: Colourbox
Гласно чистење на носот
Не само кога се сами дома, туку и во јавност или дури и во ресторани Германците го чистат носот- како воопшто да не им е гајле кога тоа го прават гласно и притоа, бескрајно долго. Во многу други земји тоа е апсолутно непристојно и потполно незамисливо.
Фотографија: Colourbox
Синхронизирани филмови и слатки пуканки
Освен во малобројни кина, филмовите се исклучиво со германски превод, наместо во оригинал, со титлови. Исто така, наместо солени постојат слатки пуканки. И не треба да се исплашите кога по рекламите повторно ќе се запали светлото и ќе се појави продавач на сладолед. Таа навика е уште од времето кога мораа да се менуваат филмските ленти.
Фотографија: Filmfest Hamburg/Cordula Kropke
Црковен данок
Воведен е уште во 1875 година, а од 1950 година директно од платата го одбива даночната управа. Осум до девет отсто од данокот на приход или добивка оди за црквата. Оној кој сака да го избегне тоа мора да излезе од црквата. Незамисливо за многу странци.
Фотографија: picture-alliance/dpa
Претплата за радио и телевизија за сите
И оној кој не гледа телевизија и не слуша радио, мора месечно да плаќа претплата за радио и телевизија. Таа се наплаќа по домаќинство, без оглед дали таму има еден или повеќе уреди. Од плаќањето на претплатата можат да бидат ослободени само граѓаните со минимални примања.
Фотографија: picture-alliance/dpa/R. Schlesinger
Во недела е сѐ затворено
Под притисок на црквата и синдикатите, во недела и за празници сите продавници мора да бидат затворени. Тој ден треба да му биде посветен на семејството и слободното време. Само пекарите се отворени претпладне, бидејќи слободен ден без лепчиња, сепак, не може да се замисли.
Фотографија: picture-alliance/dpa/F. Rumpenhorst
Туш без ѕидна шипка
Само во модерните бањи тушевите се закачени на шипка или на плафон. Но честопати, рачката од тушот мора да се држи в раце. Германците не сакаат долго туширање. Уверени се дека тоа е расфрлање со вода и дека не е здраво за кожата.
Фотографија: Fotolia/gradt
Благ ручек
Во повеќето земји за ручек дома, во кантините или во рестораните се сервираат обилни солени оброци. Десертот доаѓа на крај. Но во Германија за ручек се сервираат и пржени рендани компири со пире од јаболка, царски омлет или благи кнедли. Тоа особено го сакаат децата!
Фотографија: picture-alliance/dpa/W. Thieme
Турканици во супермаркетите
Оној кој во супермаркет ќе дојде на идеја да плаќа со ситни пари, мора да има силни нерви. Редот зад него може да стане доста долг и нетрпелив. Лути погледи и дофрлувања како „Ајде веќе платете!“. Од касиер(к)ите не треба да се очекува помош, и ним им се брза исто толку како и на други купувачи.
Фотографија: Fotolia/Robert Kneschke
Пената останува
Плакнењето на садовите не се прави со одвртена славина, туку водата се запира. Испраните садови заедно со пената се ставаат на сушење. Германците така сакаат да штедат вода, што за странците е едноставно нехигиенски.