Пивата содржат широк спектар на концентрација на алкохол и вкус. Не се сите во согласност со Указот за чистота на пивото, затоа на етикетата не стои секогаш и зборот „пиво“. Некои видови пиво се произведени од големи фирми, други пак од мали независни пиварници. Но, сите се вкусни.

Берлинското светло пиво е пченично пиво со мал процент алкохол, а се произведува од 17 век. Неговата киселкаста нота ја добива со додавање на еден лактобацил. Во Берлин ова пиво обично се сервира со дотурање малку овошен сируп. Уште Фридрих Велики знаел како се прави светло пиво, а Наполеон го „крстил“ „шампањ од северот“.

Од 1516 година германското пиво смее да содржи само вода, јачмен, слад и квасец. Прописот за чистота на пивото требало да ги спречи бескруполозните производители на пиво да му додаваат често и отровни состојки. Но, денес не постои никаква причина за забрана на природни состојки во пивото. Берлинската мала пиварница Хајденпетер на пример креираше вкусно пиво од малини, според белгиски пример.

Сол во пивото? Звучи смешно, но тоа е тајната која се крие во специјалниот вкус на пивото Госе. Тоа потекнува од регионот Харц и се произведува уште од 14 век. Мешавината од коријандер, млечни киселини и специјален локален вид квас создава пијалок со солен вкус, без да предизвикува жед. Госе е постар од Законот за чистота на пивото, затоа го ужива статусот на „специјално пиво“.

Долго траеше додека движењето за „крефт’ пиво од САД стигна до Германија, но во меѓувреме и овде се етаблираа вкусните пива од мали независни пиварници. Една од нив е и Берлинер берг, позната и надвор од националните граници која ги истражува англо-американските стилови во целата нивна разновидност. Многу омилено е Пејл Ејл!

Без оглед на надмоќта на „Пилзен“ и „Лагер“ пивата, и регионалните пивски специјалитети имаат долга традиција во Германија. На пример - „Келш“ од Келн или „Алтбиер“ од Диселдорф и околината. Ознаката „алт“, „стар“ во името значи: произведено според стара традиција. Пивото е горко и содржи голем процент на хмељ. „Ујриге“ спаѓа во најомилените традиционални пива.

Чадените пива од градот Бамберг, познат по „љубовта кон пивото“, се многу далеку од вообичаениот вид „Пилс“, каде при ферментацијата квасецот се спушта на дното. Овде сладот се загрева на отворен оган, што на пивото му дава вкус на чад. На почеток, тоа е предизвик дури и за искусни пивопијци, но е незаменлив приодружник на типичното бамбершко мезе.

Ова пиво со процентот алкохол кој го содржи, од 6 до 65 проценти, што е сегашниот светски рекорд, најчесто се препорачува и се пие во количина типична за вино и други видови посилен алкохол, во чаши наместо во шишиња.

Традиционално, темните пива како на пример тириншкиот „Кестрицер“ се „Лагер“- пива кои се чуваат заради ферментација на темно и ладно место, а чија темна боја се должи на печениот хмељ. „Блек Ница Империал Стоут“ содржи десет различни видови слад и девет проценти алкохол.

Не е никаква тајна дека во Германија се прави добро пиво. Но, како на вистински начин да се ужива во него? Секоја чаша е направена така што ги истакнува карактеристиките на одредено пиво, на пример пивото „пилс“ односно „пилснер“. Добар познавач на пива за Дојче веле објаснува дека не е неопходно потребна мала чаша за да се сочува свежиот вкус на пивото.

Некому не личат на вистински пивски чаши. За љубителите на келнското пиво „келш“ овие тесни чаши од 2 децилитри се есенцијални за зачувување на свежата нота на пивото. Велат - вистинскиот „келш“ доаѓа само од пиварниците во и во близината на Келн. Келнерите инаку секогаш автоматски на масата ставаат полна, штом муштеријата ќе ја испие чашата, освен ако ставите подметач на празната чаша.

Слично како и нивните ривали на Рајна, и Диселдорф има свој пивски специјалитет: темно пиво со името „алтбиер“. И за него се употребуваат чаши од 2 децилитри, но пократки и пошироки од чашите за „келш“. „Ако се тури во вистинска чаша, „алтбиер“ ја развива својата арома и се формира компактен слој пена“, вели пивар кој го произведува ова пиво.

„Чашата во која се сервира ’пилснер’ е потесна при врвот, така што фините ароми на сладот веднаш доаѓаат до носот“, вели за Дојче веле пивар од Есен. „Тоа го развива вистинскиот вкус на пивото“. Некои чаши за „пилснер“ се со цилиндрична форма, додека други се како овие на фотографијава, во облик на лале. Дршката на чашата е само поради декорација и нема влијание на вкусот.

Пивото на Октоберфест или т.н „хелес“, односно светло пиво, се сервира во баварската голема кригла. Оригинал направени од керамика, овие масивни кригли се создадени да преживеат повеќе рунди здравици. Празни, тие тежат над еден килограм, па не е чудо што келнерките на Октобер фест имаат развиени мускули. На здравје! Или, што би рекле Германците: Prost!

Чашите за пченично пиво се високи и заоблени. Поради голем удел јаглероден диоксид, поради кој се создава пена на врвот, овој вид пиво во чашата мора да се полни полека. Чашата е направена така што во неа, при бавно полнење, собира пиво од шише од половина литар.

Дури и војниците на Наполеон ги подигале чашите за здравица со овој „шампањ од северот“. Посебниот начин на вриење со помош на млечна киселина предизвикува меурчиња во пивото „Берлинер вајзе“ и единствен вкус, често комбиниран со арома на малина или сируп добиен од билки. Чашата во форма на пехар во која се служи пивото, е измислена за да се создаде доволно место за поголем слој пена.

Според тврдењата на една пиварница, која произведува темно пиво, секој детал од неговите карактеристични чаши во облик на пехар го слави уживањето во пивото. Формата, дебелината на чашите, начинот како е изработен работ, сето тоа ја потцртува аромата на пивото. Формата на чашата исто така го чува јаглеродниот диоксид во пивото, а поттикнува тоа да се пие полека.

Кога љубителите го пијат пивото „бенш“, тогаш в раце држат мало уметничко дело, инспирирано од дизајнерот Луиџи Колани, вели еден сопственик на пиварница во Бон. „Бенш“ е нефилтрирана верзија на „келш“, наречен по Бон, градот во кој се произведува. „Чашата за него е попопуларна од самото пиво“, со насмевка раскажува пиварот, посебно меѓу туристите кои се во потрага по сувенир.