291298 Silvester Bleigießen
1 јануари 2010Стара ковачница сместена во просторот на музејот „Шверин Муес“. Жени, мажи и деца се туркаат во малата просторија. Жешко е, зашто над местото за оган се креваат пламени јазици. Пред огнот стои ковачот Ролф Ото и топи олово. Кај него можат да се растопат малите оловни фигури, кои подоцна ја претскажуваат иднината.
„Овде имаме сад со течно олово. Тоа ќе го држиме над тенџерето и полека ќе го истураме во него, така што оловото полека ќе се движи над водата и ќе се здрви на површината. Потоа го извлекуваме и го ставаме наредното парче олово во садот и го топиме на огнот. Да се завртиме кон она што го ставивме во водата. Веќе може да се насети дека од него ќе излезе нешто убаво.“
Кај седумгодишниот Никлас и неговиот три години помлад брат Хенрик веќе работи фантазијата.
„Изгледа како диносаурус, како кула која се искривила.“
Претскажувачка - етнолог
Сега се преминува на претскажување. Гезине Кренерт е етнолог, но за Нова година, секогаш во музејот во Шверин ја претскажува иднината. Среде просторијата седи на столче, зема парче олово в рака и го разгледува од сите страни. Никлас слуша напрегнато:
„Гледам мала птица со остар клун. Тоа значи дека понекогаш сакаш да помине по секоја цена по твое. Доколку не успееш во тоа, се лутиш и клукаш, клукаш, клукаш.“
Претскажувачката за момченцето има совет:
„Ако сакате мама да има за вас малку повеќе време, мора малку да и` помогнете. Можеби можеш нешто и да и` предложиш на мајка ти? (Дете: Знам еден предлог - да се омажи).“
На Кренерт за нејзните интерпретации потребен и` е всушност само здрав разум:
„Наместо две, треба да се имаат четири очи или шест уши. Уште додека се чека на луѓето, се дознава што им е важно, каде се ориентирани, детските усти се секогаш од помош, зашто тие издаваат по нешто, а потоа треба само да се собере ’еден и еден’. “
Се претскажувало од дамнина
Колку е стар обичајот на претскажување на иднината со олово, знае Паул Јансен, кој има напишано книга на таа тема:
„Најстарите корени се наоѓаат уште кај Грците и Римјаните, Во средниот век се проширило општото претскажување, кое не било ограничено само на определен ден и важело за суеверие. Подоцна, во новото време, популарно било да се претскажува кој ќе биде иден сопруг или сопруга, или следен љубовник.“
Традицијата се задржала до денес. Етнологот Кренерт понекогаш е зачудена колку вистина се крие во нејзините претскажувања:
„Еднаш се исплашив од самата себеси. Во фигурите од оловото видов брод и две фигури над него. И претскажав дека во годината што почнува, жената ќе има патување со брод и дека на тој брод ќе запознае некого. Доаѓа истата жена наредната година и замислете си - добила на наградна игра патување со брод и таму го запознала идниот сопруг, кого и го донесе овде да го запознаам.“
Автор: Феликс Хофман / Елизабета Милошевска Фиданоска
Редактор: Трајче Тосев