Македонската кошаркарска репрезентација во драматичен финиш вчеравечер извојува победа против Хрватска со 78:76, во рамки на вториот меч од натпреварите по групи на Европското првенство во Литванија.
Во првата четвртина Македонија водеше со 21:18, додека Хрватска врати во втората четвртина со 23:16. Во третата четвртина Македонија повторно беше подобра и поведе со 23:21, додека во четвртата четвртина Македонија постигна 18 поени, а Хрватска 14.
Во последните секунди од мечот македонските кошаркари имаа предност од два поена, кои Хрватите не успеаја да ги анулираат, иако имаа можност со тројка да дојдат до победата. Ова е прва победа на Македонија на ЕП во Литванија. Селекторот Марин Докузовски на прес-конфернцијата веднаш по мечот нагласи дека заслужни за историската победа на Македонија против силната Хрватска се сите играчи, колективниот дух и големата борбеност и пожртвуваност на македонските кошаркари.
Лестер Бо Мекејлеб беше најефикасен во победничката селекција со 19 поени, Владо Илиевски постигна 18, Перо Антиќ 15, Тодор Гечевски 10 поени. Донтеј Драпер со 13 поени беше најефикасен хрватски играч.

На другите средби од 2.коло во групата „Ц“ постигнати се овие резултати: Босна и Херцеговина - Црна Гора 94:86, Финска - Грција 61:81.
Табела: Грција 4 бодови, Хрватска 3, БиХ 3, Црна Гора 3, Македонија 3, Финска 2.
По денешната пауза , македонските кошаркари во сабота во 18 часот против Грција ќе го играат третиот натпревар на Евробаскетот. 

Автор: СН/макфакс

Редактор: Борис Георгиевски