Пандев во германски Билд: за можниот крај на кариерата, честитката од Мурињо по победата над Германија, шансите на Македонија на ЕП и најважното: дали стрелецот на првиот гол заслужува споменик?
Фотографија: Petr Stojanovski/DW
Реклама
Горан Пандев се уште не е сигурен дали ќе се пензионира по Европското фудбалско првенство, но и да продолжи да игра тоа сигурно нема да го прави во германската Бундеслига:
„Не. Таму премногу се трча“, со насмевка одговара капитенот на македонската фудбалска репрезентација на прашањето на репортерите на најтиражниот германски дневен весник Билд.
Во пресрет на деби-мечот за Северна Македонија на Еуро2020 Билд објави подолго интервју со Пандев најавувајќи го како ѕвезда на тимот и еден од најпознатите фудбалери во земјата.
Германците се уште не можат да го заборават поразот во квалификациите за Светското првенство од С. Македонија, па и почетокот на разговорот изобилува со прашања за мечот и реакциите по него. Пандев признава дека на натпреварот неговиот тим имал многу среќа, но дека победата била заслужена.
„Имавме голема почит за Германија, и бевме многу концентрирани затоа што знаевме дека Германија има многу силен тим кој 20 години немаше загубено дома во квалификациите. Тактички бевме перфектно поставени. Но имавме и многу среќа. Кога даваш се од себе, тогаш и среќата ти доаѓа на помош. На почетокот Германија пропушти неколку шанси за гол, а ние потоа погодивме во вистински момент, во продолжението на првото полувреме. По водството од 1:0 знаевме дека можеме до успех“, вели Пандев за Билд.
Фотографија: Daniel Mihailescu/REUTERS
Честитката од Мурињо
Открива дека по таа голема победа, како ни по историската победа против Грузија со која беше обезбеден пласманот на ЕП, немал можност да се врати дома во Македонија и да почести за успесите затоа што морал да им се врати на клупските обврски во Ѓенова. Од бројните честитки кои ги добил по победата над Германија ја споменува најдрагата и најнеочекуваната:
„Меѓу другите од Жозе Мурињо. Ми испрати порака и и честиташе на целата репрезентација за извонредниот настап. Ми беше тренер во Интер и со него победивме против Бајерн во Мадрид во финалето на Лигата на шампионите".
По пласманот на ЕП, фудбалерите станале херои во татковината, но очекувањата тука не запреле, раскажува Пандев.
„Да, станавме херои. Но луѓе сега очекуваат повеќе. Потоа победивме и против Германија. Знаете какви се луѓето, сега мислат дека ќе го освоиме Европското. Но ние стоиме цврсто на земја." Сепак, и неговите очекувањата не се многу помали- на прашањето дали ќе биде задоволен доколку од ЕП репрезентацијата се врати без освоен бод и постигнат погодок, Пандев очекува повеќе.
„Не, нашиот тренер секогаш го бара максимумот. Имаме респект за сите. Но добро ја знаеме нашата сила и знаеме што мораме да сториме. Според мене, нашата репрезентација може да се носи со сите репрезентации во нашата група“.
Кој стои зад успехот на македонската фудбалска репрезентација
05:59
This browser does not support the video element.
Гол за крај на кариерата
Мечот со Австрија и поразот од 3:1 на отворањето на првенството е веќе минато, но фактот што токму Пандев го постигна историскиот прв (во тој момент израмнувачки) гол за С. Македонија на шампионатот веројатно ќе биде круна, но и крај на неговата кариера. На прашањето на Билд пред натпреварот „дали навивачите ќе му подигнат споменик на стрелецот на првиот гол на првенството“, Пандев низ насмевка одговара „да се надеваме“ и „ќе видиме“. Во својот познат, таблоиден стил, Билд од оваа изјава го влече и насловот на интервјуто со Пандев: „Оној кој ќе го постигне првиот гол, заслужува споменик“.
Пандев го постигнува првиот гол во историјата на С. Македонија на европските првенства. Фотографија: Daniel Mihailescu/REUTERS
Потоа најавува дека трите меча во групите би можеле да бидат последни во неговата кариера.
„Тоа би бил убав крај. Да се постигне гол на едно Европско првенство за мене ќе биде најголемиот, затоа што сите знаеме дека тоа веројатно ќе бидат моите последни настапи (во кариерата, н.з.)“.
Пандев признава дека веќе „ги чувствува годините“ (во јули ќе полни 38, н.з.) иако и понатаму е физички подготвен и живее здраво, но конечната одлука ќе ја донесе заедно со семејството по завршувањето на првенството. Планови за понатаму, засега, нема.
„Токму тоа е проблемот. Не знам. Токму тоа се прашувам, кога ќе престанам, што ќе правам понатаму? Засега сакам само да бидам подготвен за Европското првенство, да уживам и потоа ќе видиме“.
Фаворити на првенството, за најдобриот стрелец во историјата на македонската репрезентација, се оние „постојаните“: Германија, Франција, Италија, Португалија и Шпанија.
Стадионите на ЕУРО 2021
За првпат во историјата на Европските фудбалски првенства, турнирот ќе се одржи во 11 градови домаќини во 11 различни земји. Еве пригоден водич за стадионите кои ќе бидат домаќини на натпреварите ова лето.
Фотографија: picture-alliance/dpa
Лондон - Стадион Вембли
Финале во Лондон! Со 90.000 места, обновениот стадион во Вембли ќе биде најголемата арена на Еуро 2021. Дури и ако го нема историскиот сјај на „Стариот Вембли“, неговата замена исто така е импозантна. Покрај три натпревари од групите и еден осминафинален натпревар, тука ќе се одиграат и полуфиналните мечеви, како и финалето.
Фотографија: Getty Images/M. Hewitt
Минхен - Алијанц Арена
Алијанц Арената е гордост и радост на Бајерн Минхен. Изграден како чисто фудбалски стадион со капацитет од 67.812 места, тој ги исполнува највисоките стандарди на УЕФА. Вреди да се види осветлената надворешна обвивка на стадионот. За време на првенството, Минхен на ЕУРО 2021 ќе биде домаќин на трите натпревари на германската репрезентација во групата, плус на едно четвртфинале.
Фотографија: picture-alliance/dpa
Рим - Олимписки стадион
Олимпискиот стадион во Рим има 72.700 седишта, но има потреба од реновирање. На овој стадион се одржаа Светското првенство во атлетика во 1987 година, како и фудбалскиот Мундијал во 1990 година. Ова беше место на успесите на германската фудбалска репрезентација на ЕП во 1980 и на СП во 1990. Три натпревари од групната фаза и едно четвртфинале на ЕУРО 2021 ќе се играат во Рим.
Фотографија: Bongarts/Getty Images
Баку - Национален стадион
Новиот Национален стадион на Азербејџан, кој беше отворен во март 2015 година, собира 69.870 гледачи. Го замени малиот стадион „Тофик Бахрамов“ како домашен терен на репрезентацијата на Азербејџан. Во 2019 година, токму на овој стадион Челси победи во финалето во Лига Европа против Арсенал. На ЕУРО 2021, Баку ќе биде домаќин на три натпревари од групите и на едно четвртфинале.
Фотографија: Getty Images/AFP/G. Kirk
Санкт Петербург - стадион Кретовски
Стадионот „Кретовски“ во Санкт Петербург, познат и како „Газпром Арена“, е изграден за Светското фудбалско првенство во 2018 година. Арената собира 69.000 гледачи и стои на местото на стариот стадион Киров, кој беше урнат во 2006 година. Трошоците за изградба беа огромни, околу 930 милиони евра. Арената ќе биде домаќин на три натпревари од групната фаза и едно четвртфинале на годинешново ЕП.
Фотографија: Alexander Demianchuk/TASS/dpa/picture alliance
Копенхаген - Стадион Паркен
Дом на данскиот гигант ФК Копенхаген, Паркен е еден од најмалите стадиони на ЕУРО 2021 со околу 38.000 седишта. Импресивната инфраструктура на градот и модерниот лик на стадионот се адутите на Паркен. На инаугуративниот натпревар на стадионот во 1992 година, Данска загуби со 2-1 од Германија во пријателски натпревар. Овојпат се предвидени три натпревари од групната фаза и едно осминафинале.
Фотографија: THIBAULT SAVARY/AFP/Getty Images
Амстердам - Арена Јохан Кројф
Арената со капацитет од 52.960, именувана по славниот холандски број 14, е еден од најиновативните стадиони на Европското првенство. Арената има покрив што се собира и е опремена со специјални светла кои го контролираат растот на тревата. Веќе беше домаќин на натпревари на ЕУРО 2000. 21 година подоцна, Амстердам ќе биде домаќин на три натпревари од групната фаза и на едно осминафинале.
Фотографија: Dean Mouhtaropoulos/Getty Images
Букурешт - Национален стадион
Новиот романски национален стадион е изграден од 2008 година наваму, на истото место со стариот Национален стадион, изграден во 1953 година. Има капацитет од 55.600 и е домаќин на меѓународните натпревари на репрезентацијата на Романија. На ЕУРО 2021, овде ќе се играат три натпревари од групната фаза и едно осминафинале.
Фотографија: Getty Images/Afp/Barbara Sax
Севиља - Олимписки стадион
Бидејќи двата најголеми фудбалски клуба во градот - Реал Бетис и Севиља - имаат свои стадиони, фудбалски натпревари ретко се играат на „Естадио Олимпико“. Собира 57.619 гледачи. Билбао првично беше планиран како место за одржување на ЕУРО 2021, но беше отфрлен од УЕФА бидејќи регионалната влада на Баскија не можеше да гарантира присуство на гледачи поради пандемијата на коронавирусот.
Фотографија: Daniel Gonzales Acuna/dpa/picture alliance
Будимпешта - стадион Ференц Пушкаш
Стадионот, именуван по еден од најдобрите унгарски фудбалери, е местото каде унгарската фудбалска репрезентација ги игра повеќето од своите домашни натпревари. Во последниве недели, стадионот честопати беше заменска локација за натпревари во Лигата на шампионите. На Европското првенство овде ќе се одиграат три натпревари од групната фаза и еден осминафинален меч.
Фотографија: Tibor Illyes/AP Photo/picture alliance
Глазгов - Хемпден Парк
Арената со капацитет од 52.500 седишта беше најголемиот фудбалски стадион во светот се додека не се отвори Маракана во Рио де Женеиро во 1950 година. Хемпден Парк, во кој обично игра репрезентацијата на Шкотска, ќе биде домаќин на три натпревари од групната фаза и едно осминафинале на ЕУРО 2021, иако натпреварот на Шкотска против Англија во групата ќе се одигра на Вембли.
