Груевски ги обвинува Заев и СДСМ за манипулации со „бомбите“
БГ
12 јули 2019
Експремиерот Никола Груевски повторно се огласи преку Фејсбук од каде ги критикува премиерот Заев и неговата партија дека манипулирале со снимките од „бомбите“ за Мартин Нешковски, Никола Младенов и Смилковското езеро.
Фотографија: picture-alliance/AP Photo/Z. Mathe
Реклама
Во Фејсбук пост објавен доцна синоќа, експремиерот кој избега во Унгарија, повторно обвинува дека било манипулирано со снимките од „бомбите“ кои, тогаш, опозицискиот СДСМ ги објавуваше во 2015 година. Груевски особено се фокусира на снимката од неговиот разговор со поранешната министерка за внатрешни работи Гордана Јанкулоска во врска со убиството на Мартин Нешковски.
„Монтираниот аудио материјал за убиството на Мартин Нешковски имаше цел да биде најемотивната 'бомба' чија 'експлозија' требаше да ги извади луѓето на улица, во шатори пред владата и да предизвика насилни протести со многу повредени полицајци, со цел кулминација на политичката криза која ја создаде“, порачува Груевски преку својот пост на Фејсбук во кој алудира на актуелниот премиер Заев.
„Во таа криза ја гледаше својата шанса за доаѓање на власт, бидејќи поинаку беше инфериорен и беше и остана неконкурентен политичар надвор од локалното ниво, по речиси сите критериуми.“
Груевски во продолжение постира линк од текст на порталот „Инфомакс“ во кој исто така се тврди дека Заев и СДСМ манипулирале со снимките од тогашните државни функционери, повикувајќи се на нова, целосна, снимка која ја објавил извесниот „Ел Чека“.
Протестите на 5 мај 2015 година по објавувањето на снимка од разговор поврзан со смртта на Мартин НешковскиФотографија: Reuters/O. Teofilovski
Но, снимката на „Ел Чека“ во меѓувреме е избришана и разговорот во својата целовитост, како што тврди Груевски, е недостапен за пошироката јавност.
„Ел Чека“ веќе подолго време објавува прислушкувани разговори кои веројатно му припаѓаат на истиот сет материјали со кои располагаше и СДСМ пред да му бидат предадени на Специјалното јавно обвинителство. Досега објавените материјали се фокусираа повеќе на политичари и претставници на ДУИ, кои јавноста во изминатиот период немала можност да ги слушне. Изворот на „Ел Чека“ и неговата мотивација за објавување на овие снимки засега остануваат нејасни.
Груевски понатаму го обвинува Заев за „фашистичка монструозност“ префрлајќи му дека го „измамил народот со купишта вакви фабрикувани материјали и измами.“
„Прво монтирани снимки кои создаваат “експлозија од емоции” кај народот, а потоа по доаѓањето на власт нова измама преку притисок и наредба на судиите да ги прифатат овие монтирани снимки како клучни докази и шокантно и без објаснување како никаде во светот, да не прифатат нивно судско вештачење на нивната целовитост и автентичност“, пишува експремиерот.
Како #Протестирам прерасна во #ШаренаРеволуција
Протестот кој започна по убиството на Мартин Нешковски на изборната ноќ во 2011 година, и подоцна прерасна во движење под името #Протестирам, деновиве еволуираше во ткн. Шарена Револуција во Македонија.
Фотографија: BIRN/Prizma
„Стоп за полициската бруталност“
На 10 јуни 2011 години стотици млади луѓе излегоа на улиците на Скопје да протестираат против полициската бруталност, откако по неколкудневен молк од полицијата, беше откриена вистинската позадина за убиството на 22-годишниот Мартин Нешковски.
Фотографија: AP
Студентски протести
Во ноември 2014 година започнаа големите студентски протести испровоцирани од воведувањето екстерно тестирање од страна на Министерството за образование.
Фотографија: AFP/Getty Images/R. Atanasovski
#ПоздравПленумци
Во февруари 2015 година студентите започнаа со ткн. окупација на факултетите. Незадоволството, покрај на улиците, засилено се изразуваше и во зградите на УКИМ во Скопје и други градови.
Фотографија: DW/P. Stojanovski
Нов замав во 2015
Протестите се вратија на улиците на Скопје со уште поголем интензитет во мај 2015 година, откако опозицијата објави дел од прислушуваните разговори во кои можеше да се слушне како владини функционери го прикриваат убиството на Нешковски.
Фотографија: Reuters/O. Teofilovski
Жестоки судири со полицијата
Граѓанските протести доведоа и до жестоки судири со полицијата. Повеќе полицајци беа повредени, а десетици демонстранти беа приведени од полицијата. Отпорот го загуби интензитетот по крвавата пресметка со терористичката група во Куманово на 9 и 10 мај во која животите ги загубија 8 припадници на МВР.
Фотографија: Reuters/O. Teofilovski
Опозициски протест
На 17 мај 2015 година опозицијата предводена од СДСМ организираше голем протест пред платото на Владата во Скопје. Протестот беше поддржан и од повеќе студентски и граѓански организации кои дотогаш демонстрираа по разни поводи, како и од неколку албански партии.
Фотографија: Reuters/M. Djurica
Контра-протести
Владејачката ВМРО-ДПМНЕ во неколку наврати возврати на опозициските и граѓанските протести со контра-протести. Најмасовниот се одржа во Скопје на 18 мај 2015 година.
Фотографија: picture-alliance/epa/G. Licovski
Против Уставниот суд
Одлуката на Уставниот суд да укине законска одредба и да му го врати правото на претседателот на државата да помилува, го најави новиот бран протести кој трае до денес. На 16 март 2016 повеќе илјади граѓани протестираа во близина на зградата на Судот, откако полицијата им го блокираше пристапот. Контра-демонстранти организирани од партијата ГРОМ ја „чуваа“ зградата.
Фотографија: DW/P. Stojanovski
Револт против Иванов
По одлуката на Уставниот суд, Иванов набрзо го искористи вратеното право на помилување. На 12 април тој им даде „милост“ на 56 политичари и нивни соработници кои беа опфатени со истрагите на Специјалното јавно обвинителство. Својот револт граѓаните го искажаа врз неговата Народна канцеларија во Скопје.
Фотографија: Getty Images/AFP/R. Atanasovski
Порта Македонија во нови бои
Фасадата на Триумфалната капија или Порта Македонија во Скопје за првпат беше обоена на 15 април. Во знак на револт поради блoкадата на движењето, демонстрантите почнаа да фрлаат боја врз фасадата.
Фотографија: picture alliance/abaca/AA
Подготовка на „материјалот“
Балоните со боја се веќе широко распространети меѓу демонстрантите. Упатствата за нивна изработка и користење можат да се најдат и на интернет, исто како и стилизираните маички и сувенири поврзани со Шарената Револуција, поддршката за СЈО или пораките на обвинителките.
Фотографија: DW/E. Milosevska
Шарената револуција
Од 15 април, најпрво срамежливо, но веќе почна да се говори за почетокот на Шарената револуција. На нашата интернет страница ова име за првпат си го најде местото во наслов од текст објавена на 19 април. Во меѓувреме боењето или шарањето на „барокните“ владини и државни објекти во Скопје стана омилена пракса на демонстрантите.
