Груевски најави крај за „Пржино“ и „десоросоизација“
БГ
17 декември 2016
Лидерот на ВМРО-ДПМНЕ Никола Груевски во обраќање пред демонстрантите пред ДИК рече дека нема да дозволи Заев да формира влада и бара од амбасадорите да престанат да се мешаат во внатрешните работи на земјата.
Фотографија: Reuters/O. Teofilovski
Реклама
Груевски смета дека работата на Државната изборна комисија се претворила во пародија и ги обвинува странските амбасадори дека влијаеле врз нејзината работа „во правец на пост изборен инжињеринг и фалсификување на изборната волја на граѓаните на Република Македонија“. Груевски не ги именуваше странските претставници кои вршеле такво влијание, но прозва еден од независните членови на ДИК дека „не бил толку независен“.
„Доколку Управниот суд ги потврди незаконските одлуки на ДИК и му се одземе победата на ВМРО-ДПМНЕ, партијата нема да учествува во прегласувањето и нема да ги признае резултатите од изборите“, порача Груевски.
Читајќи го прогласот во четири точки кој денеска го донел Извршниот комитет на ВМРО-ДПМНЕ, Груевски порача дека партијата нема да дозволи да се формира влада, ниту да функционираат институциите.
„Нема да дозволиме Зоран Заев да формира влада со фалсификувана волја на граѓаните. ВМРО-ДПМНЕ нема да дозволи функционирање на институции со фалсификувана волја на граѓаните кои го немаат легитимитетот на граѓаните“.
Откако денеска преку партиско соопштение беа објавени детали од синоќешните разговори на Груевски со странски претставници во земјата, тој за првпат јавно и отворено ги нападна и странските претставници во Македонија и најави дека се повлекува од разговори со нив во форматот кој го предвидува Договорот од Пржино.
„Некои амбасадори почнаа премногу да се мешаат во внатрешната политика на земјата, тоа мора да запре. Остануваме отворени за комуникација со сите, но некои кои почнаа премногу да се мешаат во нашата внатрешна политика мора да престанат да го прават тоа. ВМРО-ДПМНЕ нема да дозволи понатамошно мешање на амбасадори во внатрешни прашања и бараме да останат во рамките на своите мандати“.
„ВМРО-ДПМНЕ го напушта форматот на состаноци и преговори со други политички партии во кои учествуваат амбаасдори, посредници или преставници на други држави“, вели Груевски.
Лидерот на ВМРО-ДПМНЕ најави и филтрирање на работата на невладини организации во Македонија, чекор кој го најави како „десоросизација“.
„Ќе се бориме за десоросоизација на Република Македонија и јакнење на независен граѓански сектор кој нема да биде под ничија контрола. Ќе се пристапи кон регулирање на областа на функционирање на невладините организации по теркот на најнапредните демократии во светот“, рече Груевски.
На крајот тој порача декаВМРО-ДПМНЕ „била и ќе биде прозападно ориентирана партија“, чија цел е членство на Македонија во ЕУ и НАТО и стратешко партнерство со САД.
Голема излезност и неизвесност до последен момент
Предвремените парламентарни избори го донесоа веројатно најтесниот изборен исход во историјата на независна Македонија
Фотографија: picture-alliance/dpa/N. Batev
Две победнички славја
Синоќа не само во Скопје туку и во многу други градови во Македонија изборната победа на улиците ја прославуваа и приврзениците на опозицијата и на власта. Во главниот град, симпатизерите на коалицихата околу СДСМ се собраа пред зградата на владата, додека оние на ВМРО-ДПМНЕ славеа пред седиштето на партијата во центарот на градот.
Фотографија: Reuters/O. Teofilovski
Неизвесно до последен момент
Нецелосните резултати на ДИК, упатуваат на тесна трка и минимална предност од околу 16 илјади гласови за ВМРО-ДПМНЕ пред СДСМ. Но главното прашање кое треба да го одговори ДИК е која од коалициите ќе освои повеќе пратенички места.
Фотографија: DIK
10-та изборна победа по ред
Половина час по полноќ лидерот на ВМРО-ДПМНЕ им се обрати на приврзениците во партиската централа во центарот на Скопје објавувајќи победа на неговата партија на изборите. Никола Груевски истакна дека победата имала посебна тежина и важност затоа што „СДСМ не бил единствен противник“.
Фотографија: Reuters/O. Teofilovski
Падна режимот
Лидерот на СДСМ, Зоран Заев неколку часа претходно победа објави пред приврзениците на опозицијата собрани пред зградата на македонската влада. Падна режим со пенкало, со глас. Победи животот“, рече Заев пред приврзаниците најавувајќи дека коалицијата предводена од СДСМ би требало да има најмалку еден пратенички мандат повеќе од владејачката ВМРО-ДПМНЕ.
Фотографија: picture-alliance/dpa/V. Xhemaj
Победа која не може да се слави
Лидерот на ДУИ, Али Ахмети, во обраќањето по објавувањето на неконечните резултати од изборите не го криеше незадоволството од исходот, ДУИ повторно оствари победа во албанскиот блок но за Ахмети таа е „пирова“ бидејќи неговата партија ќе добие значително помалку мандати и оти као што рече Албанците генерални загубија мандати поради парцијализацијата во мали партии.
Фотографија: picture-alliance/dpa/V. Xhemaj
Турбуленции во албанскиот блок
Парцијализацијата за која во своето обраќање говореше лидерот на ДУИ во бројки изгледа вака: ДУИ острави „Пирова победа“ со драматично намалена доверба кај гласачите (86.812), а секогаш „втората“ ДПА сега е четврта (31.017), зад движењето „Беса“ (57.927) и зад Алијансата за Албанците (35.091). Значителен број гласови од албанскиот електрорат освоил и СДСМ, велат проценките.
Фотографија: Getty Images/AFP/R. Atanasovski
Голема излезност
На голем број изборни места во Македонија во текот на целиот ден граѓаните во долги редици чекаа да го дадат својот глас. Државната изборна комисија регистрираше голема излезност од 66,88 проценти.
Фотографија: picture-alliance/dpa/G. Likovski
Без инциденти но со бројни нерегуларности
Партиите во првичните оценки за изборниот процес ја поздравија огромната излезност, но додека ВМРО-ДПМНЕ говореше за доказ за мирна, фер и демократска атмосфера, СДСМ критикуваше дека некои стари навики на власта за манипулации на изборниот процес останале. Набљудувачите упатија на голем број случаи на изборни нерегуларности.
