На средбата во Ќустендил од македонска страна покрај премиерот Никола Груевски присуствуваат и заменик претседателот на Владата задолжен за економски прашања Владимир Пешевски, министерот за надворешни работи Никола Попоски, министерот за транспорт и врски Миле Јанакиески и министерот за земјоделство шумарство и водостопанство Љупчо Димовски.

Во составот на бугарската делегација, која ја предводи премиерот Пламен Орешарски, (на насловната фотографија со дел од министрите) се и вицепремиерот Зинаида Златанова, министерот за транспорт, информатички технологии и врски Данаил Папазов и министерот за земјоделство и храна Димитар Греков.

Наскоро заеднички седници и со владите на Албанија и на Косово?

На средбите се разгпвара за унапредување и продлабочување на добрососедските односи, за прашања од интерес на двете земји, за европските и евроатлантските интеграции на регионот, продлабочување на економските односи, зголемување на трговската размена, за инфраструктурни проекти од регионално значење и други прашања од заеднички интерес.

Од македонската Влада велат дека ова е позитивен чекор кон унапредувањето на добрососедските односи и продолжување на позитивната практика на одржување средби со раководствата на соседните држави и заеднички владини седници со соседните земји, како што беше седницата со српската Влада, скорешната со Бугарија во Ќустендил, а има расположение и позитивен одговор и од Албанија и од Косово на македонските иницијативи за заеднички владини седници.

Во рамки на седницата, ќе се одржат тет-а-тет средба меѓу премиерите Груевски и Орешарски, и поединечни средби на присутните членови на владите од двете страни, за потоа да се заокружи средбата со заедничка пленарна меѓувладина седница.