Ден на жалост за жртвите од невремето во Македонија
ЖА/мета/афп8 август 2016
Македонија денеска одбележува Ден на жалост во чест на загинатите 21 лице во големото невреме кое ги зафати Скопскиот и Тетовскиот регион на викендот.
Фотографија: picture-alliance/dpa/G. Licovski
Реклама
Денеска е Ден на жалост во Македонија, според одлуката на Владата донесена вчера по страшното невреме со 21 жртва. Знамињата пред владата се на половина копје во знак на жалост.
Според последната информација од Министерството за внатрешни работи по катастрофалното невреме во Македонија на викендот, од пронајдените 21 загинато лице, 20 се идентификувани и предадени на семејствата, а една жртва не е идентификувана. Загинатите се главно во реонот на приградските населби Сингелиќ, Стајковци, Црешево и обиколницата кај Смилковци. Најголем дел од жртвите се удавиле, меѓу нив и едно осумгодишно девојче. Некои биле затекнати во автомобилите и понесени од водната стихија или зафатени од свлечишта.
На вчерашната вонредна седница, Владата донесе одлука на семејствата со загинати да им додели еднократна парична помош од 300.000 денари, а претходно такви одлуки донесоа Градот Скопје за 180.000 денари и општина Гази Баба за 100.000 денари.
Во скопскиот и тетовскиот регион е прогласена кризна состојба во наредните 15 дена.
Апокалиптични сцени од невремето во Македонија
Во страшното невреме од обилен дожд и силен ветер и поплавите кои го погодија главниот град Скопје и околината загинаа најмалку 21 лице, има поголем број повредени. Слики на катаклизма: уништени куќи, однесени автомобили
Фотографија: picture-alliance/dpa/G. Licovski
Северните населби околу Скопје меѓу најпогодените
Министерството за внатрешни работи соопшти дека од пронајдените 21 загинато лице, 20 се идентификувани и предадени на семејствата, а една жртва не е идентификувана. Загинатите се пронајдени во реонот на приградските населби Сингелиќ, Стајковци, Црешево и обиколницата кај Смилковци, каде поплавите оставија пустош зад себе, оштетувајќи домови, возила и инфраструктура.
Фотографија: Getty Images/AFP/R. Atanasovski
Скопје под вода
Голем број улици и булевари во Скопје беа целосно непроодни. Поплавите беа предизвикани од обилни врнежи дожд од над 90 литри на квадратен метар, а дуваше ветар со брзина и до 70 километри на час. Скопје и Тетово се прогласени за кризни региони.
Фотографија: picture-alliance/dpa/G. Licovski
Слично на кошмар
Граѓаните од погодените места сведочат за сцени кога трчале да се спасат себеси и она што можат од домовите. Поплавени домови, превртени автомобили, затрупани улици со кал, камења и отпад.
Фотографија: Getty Images/AFP/R. Atanasovski
Огромни материјални штети
Сеуште е рано за проценка, но невремето предизвика огромни материјални штети.
Фотографија: picture-alliance/dpa/G. Licovski
Помош за настраданите
Владата донесе одлука на семејствата со загинати да им додели еднократна парична помош од 300.000 денари, а претходно такви одлуки донесоа Градот Скопје за 180.000 денари и општина Гази Баба за 100.000 денари.
