За Сиријците кои во Лајпциг го врзаа и на полицијата ѝ го предадоа својот сонародник, кој беше во бегство, пофалба има не само на социјалните мрежи, туку таа стигнува и од највисоките позиции - благодарност изрази и канцеларката Ангела Меркел, која во моментов е во Африка. Без храбрата акција на Сиријците, 22-годишниот Џабар ал-Бакр веројатно немаше да биде толку бргу фатен. Ал Бакр е осомничен за тероризам, а во Германија дошол како бегалец.

Според она што досега е познато, ситуацијата била исклучително загрижувачка. Ал Бакр имал контакт со терористичката милиција „Исламска држава“ и поседувал експлозив ТАТП со кој можел да изврши разорен напад. И во случајот со терористичките напади во Париз и Брисел во игра беше ТАТП. Експлозивот, кој инаку е тешко да се направи, веќе бил измешан во моментот кога полицијата во саботата влезе во стан во Кемниц и го заплени. Ископана е дупка, за да се спроведе контролирана експлозија.

Муниција за двете страни - поларизацијата останува

Следуваше вознемирувачки викенд, во текот на кој полицијата во покраината Саксонија трагаше по Ал Бакр. Сѐ до моментот кога неговите сонародници, каде побарал засолниште, не се јавија во полиција. Тие го сторија вистинското и го заслужија признанието кое сега им се дава. Презедоа и личен ризик - полицијата од безбедносни причини не го открива нивниот вистински идентитет, поради можна одмазда.

Нивното храбро дело меѓутоа не менува ништо во ставот на оние кои сосема недиференцирано поттикнуваат омраза против бегалците. На социјалните мрежи битката меѓу „про“ и „контра“ таборот се води со несмалена жестина. Случајот служи како муниција за двете страни. Додека едни бараат орден за заслуги за „добрите Сиријци“, подбуцнувачите на омраза имаат апсурдна претпоставка дека текот на апсењето бил инсцениран од страна на канцеларката, за да се смени расположението во земјата во полза на бегалците.

Големата опасност од терористички напад во Германија и натаму е присутна. Постојано има апсења на осомничени бегалци кои се во контакт со ИД или планираат напади. Оваа опасност повторно е потенцирана со случајот на Ал Бакр. На безбедносните служби им се познати многу т.н. „загрозувачи“, но не се познати сите. Тоа што со најновото апсење е спречен можен тежок терористички напад, е успех. Но, ризикот останува.