Пробивот се случи побргу отколку што се очекуваше и германската канцеларка Ангела Меркел може да биде многу задоволна. Германско-францускиот предлог, кој го поддржаа сите членки на Еврогрупата, предвидува вклучување на ММФ со можни кредити во вредност од повеќе милијарди евра за силно задолжената Грција и е дополнување на парите што би ги ставиле на располагање земјите од ЕУ.

До пред кратко време Германија беше изолирана во барањето за вклучување на ММФ во кризниот план.

Одлука како решавачки сигнал

Олеснувањето беше забележливо и кај грчкиот премиер, Јоргос Папандреу:

„Европа направи голем чекор. Денеска ние донесовме решение не само за Грција.“

И новиот претседател на Советот на ЕУ, Херман ван Ромпој, кој за првпат водеше еден Самит на Унијата, изрази задоволство од компромисот. Новиот кризен план, за разлика од претходно предложениот Европски фонд за помош, не повредува ниту еден важечки закон на ЕУ. Важно е што во моментов е испратена јасна политичка порака од Брисел, истакна Ван Ромпој:

„Се надеваме дека тоа ќе ги смири и оние кои имаат грчки државни обврзници, односно дека Еврозоната никогаш не би ја оставиле Грција да пропадне.“

Помошта функционира само во краен случај

Договорениот механизам меѓутоа би требало да биде ставен во функција само во апсолутна нужда и со едногласна одлука на Еврогрупата:

„Согласноста што ја постигнавме денеска е пред се’ од превентивна природа. Целта е се разбира да не се дозволи планот да биде активиран“, рече францускиот претседател Никола Саркози.

Засега сите во Еврогрупата, вклучувајќи го и нејзниот претседател Жан Клод Јункер, веруваат во успех на програмата на Грција за консолидација на нејзиниот финансиски систем.

Автор: Сузане Хен/ Симе Недевски

Редактор: Жана Ацеска