Доколку согласноста за името Република Северна Македонија што ја постигнаа премиерите на Грција и на Македонија, Алексис Ципрас и Зоран Заев, навистина биде спроведена, тоа ќе стави не само крај на деценискиот конфликт меѓу двете земји, туку ќе има и низа позитивни последици за овој дел од континентот и за цела Европа, оценува Франц Шаузбергер во гостинскиот коментар со наслов „Надеж за полет на Западниот Балкан“ во австрискиот весник „Ди пресе“.

Според Франц Шаузбергер, универзитетски професор од Салцбург и специјален советник на Европската комисија за Западен Балкан и Украина, тоа би било и „сигнал дека ЕУ - меѓу другото и благодарение на напорите на австрискиот еврокомесар Јоханес Хан - може успешно да ја игра својата улога на мировен посредник и тоа и покрај огромните тешкотии во сопствените редови“.

Весникот дава историски преглед на настаните околу Македонија и македонското прашање на крајот на 19. и во 20. век, и оценува:

„Доколку постигнатиот договор биде ратификуван, тоа може да има низа последици. За Македонија со тоа е отстранета значајна пречка за почеток на преговори со ЕУ за приклучување. Тоа значи дека веројатно ќе бидат почнати и преговори со Албанија. Двете земји се спомнуваат во пакет во стратегијата на ЕУ. Меѓутоа, Албанија мора прво да докаже дека е сериозна со правосудната реформа и дека се постапува остро не само против корумпираните правосудни службеници од пониските нивоа, туку и против највисоките судии.

Завршувањето на конфликтот меѓу Македонија и Грција може повторно да им даде полет и на преговорите помеѓу Србија и Косово. Косовскиот парламент неодамна сепак успеа да го ратификува спорниот договор со Црна Гора за границата... Дали македонско-грчкото решение ќе има позитивен ефект и врз решавањето на многу нерешени прашања меѓу националностите во Босна и Херцеговина, останува да се види. Доколку тоа не се случи, оваа земја ќе падне многу на листата на европска интеграција.

Останува надежта дека членките на ЕУ, пред сѐ скептиците и кочничарите од Франција, Холандија и делумно и Германија, на самитот на 28 јуни ќе го признаат напредокот на Западниот Балкан и ќе дадат зелено светло за почеток на преговори со Македонија и Албанија. Во секој случај, овој развој во македонското прашање, кој радува, придонесува за зајакнување на мирните перспективи на овој компликуван и нестабилен дел на нашиот континент и со тоа генерално придонесува за мирот во Европа“, оценува Шаузбергер во весникот „Ди пресе“.